საქართველოს პარლამენტის იურიდიულ საკითხთა კომიტეტის თავმჯდომარის, ეკა ბესელიას განცხადებით, იუსტიციისა და სასჯელაღსრულების სამინისტროების გაერთიანება დღის წესრიგში დგას.

ეკა ბესელიას განმარტებით, ამ ორი სტრუქტურის გაერთიანებაზე დიდი ხანია მსჯელობა მიდის, თუმცა საბოლოო გადაწყვეტილებას მას შემდეგ მიიღებენ, რაც სტრუქტურულ ცვლილებებს მთლიანობაში დაინახავენ.

ქართული ოცნების დეპუტატის, საპროცედურო საკითხთა კომიტეტის თავმჯდომარის გიორგი კახიანის თქმით, ფინანსთა, ეკონომიკისა და საგარეო საქმეთა მინისტრები შეიცვლებიან.

გიორგი კახიანის თქმით, 19 ივნისს მთავრობის ნდობის გამოცხადების პროცედურები დაიწყება და ოთხშაბათს, 20 ივნისს პარლამენტის პლენარულ სხდომაზე მთავრობის არსებულ შემადგენლობას ნდობას გამოუცხადებენ.

მთავრობის დამტკიცების შემდეგ, უახლოეს მომავალში, მომზადდება ახალი კანონპროექტები, რომლითაც მთავრობის სტრუქტურაში ცვლილებები შევა.

საქართველოს პრემიერ-მინისტრობის კანდიდატის, მამუკა ბახტაძის განცხადებით, მთავრობა პარლამენტში ნდობის გამოსაცხადებლად არსებული შემადგენლობით წარდგება.

მისი განმარტებით, სამთავრობო ცვლილებები მას შემდეგ განხორციელდება, რაც მთავრობის შემადგენლობაში სტრუქტურული ცვლილებები შევა და კანონის დონეზე დამტკიცდება. მამუკა ბახტაძემ დააანონსა, რომ სამინისტროების რაოდენობა 14-დან 11-მდე შემცირდება.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა და ამის მიზეზად გუნდში არსებული აზრთა სხვადასხვაობა დაასახელა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.