შალვას [თადუმაძეს], რომელსაც მე ძალიან კარგად ვიცნობ, ვურჩევ, რომ არ იჩქაროს, რადგან კიდევ ბევრი სანქციები იქნება სხვადასხვა სახელმწიფოსგან, დააგროვოს და ისე მიმართოს ევროპულ სასამართლოს, — ამის შესახებ პარტია გახარია საქართველოსთვის ლიდერმა, გიორგი გახარიამ bm.ge-ს ეთერში თქვა. მისი თქმით, საჭიროა, რომ ინდივიდუალური, პერსონალური სანქციები კიდევ უფრო შორს წავიდეს. რაც შეეხება აშშ-ს პოლიტიკას "ოცნების" ხელისუფლებისადმი, გახარია ფიქრობს, რომ 20 იანვრის შემდეგ აშშ-ს დამოკიდებულება არ შეიცვლება.

"საჭიროა, რომ ინდივიდუალური, პერსონალური სანქციები კიდევ უფრო შორს წავიდეს. იმიტომ, რომ ეს კონკრეტულია ადამიანები ისეთ ზიანს აყენებენ ქვეყანას, რომ საერთაშორისო საზოგადოებამ ამაზე რეაგირება უნდა მოახდინოს. მაგრამ ეს რეაგირება არ უნდა შეეხოს საქართველოს რიგით მოქალაქეებს —– არც სავიზო შეზღუდვები, არც სხვა რაიმე სანქციები. ...უნდა იყოს ფინანსური სანქციები, ამასაც მოვესწრებით. ეს იქნება 20 იანვრამდე. თუ ვინმეს ჰგონია, რომ ეს სანქციები, რომელიც [აშშ-ს] ძველი ადმინისტრაციის მიერ იქნება დაწესებული, არ იქნება ორპარტიული, ძალიან ცდება. მათ ძალიან დიდი იმედგაცრუება ელოდება.

რაც შეხება ევროკავშირს, ევროკავშირი ძალიან რთული ბიუროკრატიული სისტემაა. მათგან ჩვენ ასეთ სანქციების მოლოდინი არც გვქონდა, მაგრამ ორმხრივ რეჟიმში, კონკრეტული სახელმწიფოები იმ ტალღას გააგრძელებენ, რომელიც დაიწყო. ამიტომ, შალვას [თადუმაძეს], რომელსაც მე ძალიან კარგად ვიცნობ, ვურჩევ, რომ არ იჩქაროს, რადგან კიდევ ბევრი სანქციები იქნება სხვადასხვა სახელმწიფოსგან, დააგროვოს და ისე მიმართოს ევროპულ სასამართლოს და მერე ვნახოთ რა შედეგებს მიიღებენ", — განაცხადა გიორგი გახარიამ.

ცნობისათვის, 18 დეკემბერს გავრცელდა ინფორმაცია იმის შესახებ, რომ უზენაესი სასამართლოს სისხლის სამართლის საქმეთა პალატის თავმჯდომარე, შალვა თადუმაძე გეგმავს დასანქცირების გამო ადამიანის უფლებათა ევროპულ სასამართლოს მიმართოს.

გიორგი გახარიამ bm.ge-ი ეთერში ისიც თქვა, რომ ქართული ოცნება დგას 3 ფუნდამენტურ ბოროტებაზე: მოძალადე ზონდერ დაჯგუფებები, პროპაგანდა და კორუფცია. ამ სამ საყრდენს იყენებს იმისთვის რომ ძალაუფლება შეინარჩუნოს.

გახარიამ ბოლო პერიოდში ბიზნესის გააქტიურებაზეც ისაუბრა. მისი თქმით, ცოტა ადრე რომ ყოფილიყო, იქნებოდა უკეთესი, მაგრამ სჯობს გვიან, ვიდრე არასდროს.

"მათ [მსხვილ ბიზნესს] მოუწევთ კრიტიკულ მომენტში გადაწყვეტილების მიღება. ან ჩაჰყვებიან ბოლომდე ამ რეჟიმს ან დადგებიან ხალხის მხარეს. ხალხის მხარეს დადგომა მათ გარკვეულ იმუნიტეტს შესძენს", — თქვა გახარიამ bm.ge-ზე.