საქართველოს პატრიარქმა ილია მეორემ მსოფლიოს საპატრიარქოს წარმომადგენლებთან ერთად სამების საკათედრო ტაძარში საკვირაო წირვა ჩაატარა. ლიტურგიის დასრულების შემდეგ ღალის მიტროპოლიტმა ემანუელმა და სმირნის მიტროპოლიტმა ბართლომეოსმა საქართველოს კათოლიკოს პატრიარქს და საქართველოს ეკლესიას სრული თანადგომა აღუთქვეს.

"უზომოდ მოხარულები ვართ, რომ თქვენთან ერთად მონაწილეობა მივიღეთ საღვთო ლიტურგიაში. თქვენთან ჩამოტანილი გვაქვს მსოფლიო პატრიარქის, ბართლომეუსის ძმური სიყვარული. ჩვენ მოხარული ვართ თქვენთან თანამშრომლობით ეკლესიისთვის საჭირბოროტო საკითხებთან დაკავშირებით. მსოფლიო საპატრიარქო და მისი უწმინდესობა, მსოფლიო პატრიარქი ბართლომეუსი ყოველთვის არის თქვენს გვერდით ყველა იმ საკითხში, რომელშიც თქვენი ეკლესია საჭიროებს თანადგომას და დახმარებას", - მიმართა მიტროპოლიტმა ემანუელმა პატრიარქს.

მისი თქმით, მსოფლიო პატრიარქი და მსოფლიო საპატრიარქო ყველა წამოწყებაში საქართველოს ეკლესიის გვერდით იქნებიან.

"ღმერთმა დალოცოს და გააძლიეროს ქართველი ხალხი, რომელიც ბურჯია რეგიონში მართმადიდებლობის და ქრისტიანობის",- განაცხადა მიტროპოლიტმა.

მადლობის ნიშნად ილია მეორემ სტუმრებს საჩუქრად საკუთარი ხელით დაწერილი ხატი უსახსოვრა