შინაგან საქმეთა სამინისტრომ, გლდანში, PAY აპარატების ჯგუფურად დაყაჩაღებისა და უკანონო საზღვრის კვეთის ბრალდებით ნათესაურ კავშირში მყოფი პირები თბილისში და სარფში დააკავა.

გამოძიების ვერსიით, დაკავებულებმა სწრაფი ჩარიცხვის აპარატების ინკასატორზე ვითომ ყაჩაღური თავდასხმა დაგეგმეს და ზაჰესში განახორციელეს.

"თავდასხმის იმიტაციით მათ პოლიციისთვის კვალის არევა და დიდი ოდენობით თანხის (149,828 ლარი, 220 დოლარი) მითვისება, ასევე ქვეყნის უკანონოდ დატოვება სცადეს", - ნათქვამია შსს-ს განცხადებაში.

გამოძიება ჯგუფურად ჩადენილი ყაჩაღობის ფაქტზე საქართველოს სისხლის სამართლის კოდექსის 179-ე მუხლის 2-ლი ნაწილის ბ ქვეპუნქტით დაიწყო.

შსს-ს ცნობით, გამოძიების მსვლელობისას, მოწმის სახით გამოკითხულმა ინკასატორმა სამართალდამცველებს თავდაპირველად განუცხადა, რომ ზაჰესში მას ორმა დაუდგენელმა პირმა მას ინკასაციის დროს ამოღებული 149,828 ლარი და 220 დოლარი წაართვა.

უწყების განცხადებით, გამოძიებით გაირკვა, რომ სწრაფი ჩარიცხვის აპარატების ინკასატორმა ნათესავის მონაწილეობით დაგეგმა ყაჩაღობის ინსცენირება.

დაკავებულებს ბრალად ედებათ საქართველოს სისხლის სამართლის კოდექსის 182-ე მუხლის მე-2 ნაწილის ა დ და მე-3 ნაწილის ბ ქვეპუნქტით, ასევე 370-ე მუხლის მე–3 ნაწილით და 344 მუხლის პირველი ნაწილით გათვალისწინებული დანაშაულების ჩადენა (წინასწარ შეთანხმებული ჯგუფის მიერ სამსახურეობრივი მდგომარეობის გამოყენებით დიდი ოდენობით თანხის მითვისება, ცრუ ჩვენება და საზღვრის უკანონო კვეთა.)