სამართლიანმა არჩევნებმა პირველი ივლისიდან წინასაარჩევნო გარემოს მონიტორინგი დაიწყო. ორგანიზაციამ დღეს 2016 წლის 8 ოქტომბრის საპარლამენტო არჩევნების მონიტორინგის პირველი შუალედური ანგარიში გამოაქვეყნა.

ანგარიშის მიხედვით, თბილისის საკრებულოს წევრმა და პარტია ქართული ოცნება - დემოკრატიული საქართველოს ფრაქციის თავმჯდომარემ, რიმა ბერაძემ, საქველმოქმედო ორგანიზაციის მეშვეობით პედაგოგებს სამედიცინო მომსახურება გაუწია, რაც ამომრჩევლის მოსყიდვის ნიშნებს შეიცავს.

"სერვისის მიმწოდებელი ორგანიზაცია საქმიანობას პარტიული სიმბოლიკით ახორციელებდა, რაც საქველმოქმედო ორგანიზაციებს საარჩევნო პერიოდში ეკრძალებათ" - წერია ანგარიშში.

ამომრჩევლის მოსყიდვის ფაქტს აუდიტის სამსახური სწავლობს, ხოლო ცესკო იკვლევს წინასაარჩევნო კამპანიაში არაუფლებამოსილი პირის მონაწილეობის საკითხს.

სამართლიანი არჩევნებისა და დემოკრატიის საერთაშორისო საზოგადოებამ (შემდგომში სამართლიანი არჩევნები) შეერთებულ შტატების საერთაშორისო განვითარების სააგენტოს (USAID) და ეროვნული წვლილი დემოკრატიისთვის (NED) ფინანსური მხარდაჭერით წინასაარჩევნო პერიოდის მონიტორინგი 2016 წლის 1 ივლისიდან დაიწყო.

წინამდებარე ანგარიში მოიცავს 2016 წლის 1 ივლისიდან 18 ივლისის ჩათვლით პერიოდს, აგრეთვე მოვლენებს, რომელთა განვითარება 1 ივლისამდე დაიწყო და მონიტორინგის პერიოდშიც მიმდინარეობდა.