საგამოძიებო კომისია მტკიცებულებების გაცნობას იწყებს და საზოგადოებას ოთხშაბათს აცნობებს იმ პირთა სიას, რომლებიც კომისიის წინაშე დაიკითხებიან. ამის შესახებ ევროპული საქართველოს დეპუტატმა, საგამოძიებო კომისიის წევრმა ოთარ კახიძემ განაცხადა.

მისი თქმით, კომისიამ საქმის შესწავლა ზაზა სარალიძესთან და მის ადვოკატთან შეხვედრით დაიწყო.

"საგამოძიებო კომისია ასევე თანამშრომლობს ნინო ლომჯარიასთან. სახალხო დამცველი მუშაობს აღნიშნულ საქმეზე და კოორდინირებულები ვართ საქმის შესწავლის ფარგლებში. ვიწყებთ მტკიცებულებების გაცნობას და საზოგადოებას ოთხშაბათს ვაცნობებთ იმ პირთა სიას, ვინც მოვლენ და კომისიის წინაშე დაიკითხებიან", - აცხადებს ოთარ კახიძე.

ხორავას ქუჩაზე მომხდარი მკვლელობის საქმის მასალები პარლამენტის საგამოძიებო კომისიას დღეს უნდა გადაეგზავნოს, რის შემდეგაც უნდა დაიგეგმოს თუ რა ფორმატით მოხდება საქმესთან დაკავშირებული პირების გამოკითხვა.

ხორავას ქუჩის საქმეზე შექმნილმა საგამოძიებო კომისიამ პარლამენტში პირველი სხდომა 8 ივნისს გამართა. სხდომის შინაარსი ტექნიკური ხასიათის იყო და კომისიის მუშაობის პრინციპების დაზუსტებით შემოიფარგლა.

საგამოძიებო კომისიის პირველი სხდომის დაწყებამდე სერგი კაპანაძე, ევროპული საქართველოს სხვა დეპუტატებთან ერთად, ხორავას ქუჩაზე მოკლული ზაზა სარალიძის მამას შეხვდა. ასევე საგამოძიებო კომისიის მუშაობის დაწყებამდე სერგი კაპანაძე არასამთავრობო ორგანიზაციების წარმომადგენლებს შეხვდა.

6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.

კომისიის შემადგენლობა 17 წევრით განისაზღვრა. უმრავლესობასა და უმცირესობას შორის შეთანხმებით, კვოტების მიხედვით, 9 ადგილი კომისიაში ეკუთვნის უმცირესობას - ევროპულ საქართველოს თავისი ფრაქციებით, ერთი ეკუთვნის პატრიოტთა ალიანსს. კომისიის შემადგენლობაში არ იქნება ერთიანი ნაციონალური მოძრაობა. კომისიას სერგი კაპანაძე უხელმძღვანელებს.