ამ წუთებში, საქართველოს პარლამენტში, ხორავას ქუჩის საქმეზე შექმნილი საგამოძიებო კომისიის პირველი სხდომა იმართება. შეხვედრა საორგანიზაციო ხასიათისაა და მოკლე დღის წესრიგი აქვს.

კომისიის თავმჯდომარის ევროპული საქართველოს დეპუტატის სერგი კაპანაძის განცხადებით, პარლამენტში საგამოძიებო კომისიის შექმნის გადაწყვეტილების საფუძველი ის პროტესტი გახდა, რომელიც ხორავას ქუჩის საქმეზე გამოცხადებულ განაჩენს მოჰყვა.

მისი თქმით, კომისია გააანალიზებს იმ დოკუმენტებს, რომელიც არსებობს საქმეში და ყველაფერს გააკეთებს, რომ უმოკლეს ვადაში მიიღოს გადაწყვეტილებები.

საგამოძიებო კომისიის პირდაპირ ეთერს შეგიძლიათ უყუროთ ლინკზე.

საგამოძიებო კომისიის პირველი სხდომის დაწყებამდე სერგი კაპანაძე, ევროპული საქართველოს სხვა დეპუტატებთან ერთად, ხორავას ქუჩაზე მოკლული ზაზა სარალიძის მამას შეხვდა.

ზაზა სარალიძე კომისიას ენდობა, თუმცა უნდობლობას უცხადებს ეკა ბესელიას. ზაზა სარალიძემ განაცხადა, რომ ის კომისიის თავმჯდომარესთან დააყენებს საკითხს, რომ ეკა ბესელიამ კომისიაში მუშაობა არ გააგრძელოს.

6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.

კომისიის შემადგენლობა 17 წევრით განისაზღვრა. უმრავლესობასა და უმცირესობას შორის შეთანხმებით, კვოტების მიხედვით, 9 ადგილი კომისიაში ეკუთვნის უმცირესობას - ევროპულ საქართველოს თავისი ფრაქციებით, ერთი ეკუთვნის პატრიოტთა ალიანსს. კომისიის შემადგენლობაში არ იქნება ერთიანი ნაციონალური მოძრაობა. კომისიას სერგი კაპანაძე უხელმძღვანელებს.