ხორავას ქუჩის საქმეში მოწმეებზე ზემოქმედების ბრადებით დაკავებული მერაბ მორჩაძე შინაგან საქმეთა სამინისტროდან დროებითი მოთავსების იზოლატორში გადაიყვანეს. ამის შესახებ ინფორმაცია საზოგადოებრივმა მაუწყებელმა გაავცრელა.

შინაგან საქმეთა სამინისტროში შეყვანამდე მერაბ მორჩაძემ ჟურნალისტებთან კომენტარი გააკეთა და განაცხადა, რომ სიმართლე მალე გაირკვევა და მისი დაკავება აბსურდია.

"არ ვიცი, რა ბრალდებით ვარ დაკავებული, გამოვალ და მერე გეტყვით. ერთ-ერთი მოზარდის ნათესავი ვარ. მართლა არაფერი ვიცი. სიმართლე არ მგონია, რომ დაიკარგოს", - განაცხადა მერაბ მორჩაძემ.

შსს-ს ინფორმაციით, მორჩაძის დაკავება მკვლელობის ძირითადი საქმიდან გამოყოფილი იმ სისხლის სამართლის საქმის ფარგლებში განხორციელდა, რომელზეც გამოძიებას შინაგან საქმეთა სამინისტრო აწარმოებს. შსს ამ ეტაპზე არ აკონკრეტებს ვისზე განხორციელებული შესაძლო ზეწოლის ბრალდებით დააკავეს მერაბ მორჩაძე.

მერაბ მორჩაძე საზოგადოებას თბილისში, წითელ ბაღში მომხდარი დაჭრის ფაქტიდან ახსოვს. ის დაპირისპირების დროს დაჭრილი. 35 სკოლის ერთ-ერთი მოსწავლის ბიძიაა.

ზაზა სარალიძის განცხადებით, მისთვის მერაბ მორჩაძის სახელი უცნობია.

რუსთავი 2-ის ინფორმაციით, ხორავას ქუჩის საქმის გამოძიების ფარგლებში სახელმწიფო ექსპერტიზის ბიუროს ექსპერტი, თამარ შოშიტაიშვილი ამ წუთებში დაკითხვაზე იმყოფება. კრიმინალისტები დღეს მკვლელობის ადგილზე, ხორავას ქუჩაზეც მუშაობდნენ.