ერთიანი ნაციონალური მოძრაობის წევრი, გიგა ბოკერია პრეზიდენტისა და საკონსტიტუციო სასამართლოს თავჯდომარის განცხადებებს ეხმაურება და განმარტავს, რომ ქვეყანაში არის კატასტროფული მდგომარეობა, რომლის გამოსწორება მხოლოდ 2016 წლის საპარლამენტო არჩევნებით არის შესაძლებელი:

"საკონსტიტუციო სასამართლოს თავმჯდომარე, ქვეყნის პრეზიდენტი პირდაპირ აცხადებენ, რომ მათზე და მათი ოჯახის წევრებზე ხორციელდება პოლიტიკურად მოტივირებული ზეწოლა. პრემიერმინისტრი არაფერს წყვეტს და ხალხი, რომელიც პირდაპირ ემორჩილება ივანიშვილის რეჟიმს და ივანიშვილს პირადად, ამ უკანონო ქმედებებს ჩადის.

ეს არის კატასტროფული მდგომარეობა. ქვეყანაზე ზრუნვის მაგივრად, ეს ახლის საკუთარი ძალაუფლების შენარჩუნებისთვის ყველაფერზე მიდის. სწორედ ამიტომ, ოქტომბერში ამას არჩევნების გზით უნდა დავუსვათ წერტილი".

დღეს, მას შემდეგ, რაც პრეზიდენტი გიორგი პაპუაშვილს შეხვდა, საგანგებო ბრიფინგი გამართა და თავადაც განაცხადა, რომ სამართალდამცავების მხრიდან მისი ოჯახის წევრზე ზეწოლის განხორციელების მცდელობა იყო:

"ეს იყო ზეწოლა ჩემი ოჯახის წევრზე რომელიც გააჩერეს ქუჩაში და მერე მის სახლში ჩაატარეს ჩხრეკა ყოველგვარი სასამართლოს დადგენილების გარეშე, რაღაცა იმედით, რომ ამას რაღაც მოჰყვებოდა".

21 ივლისს კი საკონსტიტუციო სასამართლოს თავჯდომარემ, გიორგი პაპუაშვილმა განაცხადა, რომ რომ სასამართლოს მოსამართლეებზე და მათ ახლობლებზე ზეწოლა, თვალთვალი და მუქარა მიმდინარეობს.