ერგნეთში, არჩილ ტატუნაშვილის საქმეზე, ინციდენტების პრევენციის შეხვედრა დასრულდა. სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილის ირაკლი ანთაძის თქმით, შეხვედრაზე დღემდე დაფიქსირებული ყველა ინციდენტი განიხილეს. მთავარი ყურადღება კი არჩილ ტატუნაშვილის წამებისა და მკვლელობის საკითხს დაეთმო.

"ჩვენ მივაწოდეთ შეხვედრის მონაწილეებს ინფორმაცია ექსპერტიზასთან დაკავშირებით, მოვითხოვეთ შინაგანი ორგანოების გადმოცემა", - განაცხადა ირაკლი ანთაძემ.

მისი თქმით, ქართულ მხარეს ექსპერტიზის დასკვნა მატერიალური სახით არ გადაუცია. კითხვაზე, აპირებენ თუ არა უზრუნველყონ ექსპერტიზის თარგმანი და მიწოდება ოსური მხარისთვის, ირაკლი ანთაძეს პასუხი არ გაუცია.

მისივე თქმით, ქართულმა მხარემ ტატუნაშვილის ორგანოების გადმოცემა კატეგორიულად მოითხოვა, თუმცა მოლაპარაკების მეორე მხარემ მოთხოვნა უპასუხოდ დატოვა.

ერგნეთში შეხვედრის დროს, დავით ბაშარულის გაურკვეველ ვითარებაში გარდაცვალებასთან დაკავშირებითაც დაისვა კითხვა, თუმცა ე.წ. ოსურმა მხარემ კითხვას თავი აარიდა.

არჩილ ტატუნაშვილის მკვლელობის საქმეს წამების კვალიფიკაცია დაემატა. ექსპერტიზის დასკვნამდე გამოძიება მკვლელობის და თავისუფლების უკანონო აღკვეთის კვალიფიკაციით მიმდინარეობდა.

ტატუნაშვილის საქმე

არჩილ ტატუნაშვილის ცხედარი ოკუპირებული ტერიტორიიდან გარდაცვალებიდან 26 დღეში, 20 მარტს გადმოასვენეს. ტატუნაშვილი თითქმის ერთი თვის წინ, 22 თებერვალს ცხინვალის ციხეში გაურკვეველ ვითარებაში გარდაიცვალა. ოსური მხარის ვერსიით, ის იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებდა, რომ ტატუნაშვილი ინფარქტით დაიღუპა. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენება, თუმცა დე ფაქტო ხელისუფლებამ მაშინ პოზიცია შეცვალა.