საქართველოს მთავრობა რძის მწარმოებელი სასოფლო-სამეურნეო კოოპერატივების მხარდასაჭერად მესაქონლეობის სასოფლო-სამეურნეო კოოპერატივებს მცირე საველე ლაბორატორიებს გადასცემს, რათა ადგილზე შეძლონ რძის ხარისხის დადგენა. აღნიშნულის შესახებ, პრემიერ მინისტრმა გიორგი კვირიკაშვილმა, 25 მარტის მთავრობის სხდომაზე ისაუბრა.

პრემიერის განცხადებით, პროგრამა საშუალებას მისცემს მესაქონლეობის სასოფლო-სამეურნეო კოოპერატივებს, არამარტო რძის შემკრები პუნქტი მოაწყონ, არამედ მათ რძის ხარისხის შესამოწმებელი აპარატურა გადაეცემათ, რომელიც მისივე თქმით 40 ათასიდან 75 ათასამდე ლარის ღირებულებისაა.

"დღეს დაახლოებით 30-მდე ასეთი კოოპერატივია. ეს პროგრამა დაეხმარება მათ, არა მხოლოდ შეაგროვონ ადგილებზე რძე და შემდგომში მიაწოდონ უფრო მსხვილ მწარმოებლებს, არამედ თვითონაც აწარმოონ რძის პროდუქტები და ყველის წარმოებაზე გადავიდნენ",- განაცხადა გიორგი კვირიკაშვილმა.

პრემიერ-მინისტრის განმარტებით, აღნიშნული პროგრამა სოფლად წვრილი მეწარმეობის განვითარებას შეუწყობს ხელს.