Sputnik-ის ინფორმაციით, რუსეთის მოქალაქეობის მქონე სამხრეთ ოსეთის მოსახლეობა დუმის არჩევნებში მონაწილეობის მიღებას დე-ფაქტო რესპუბლიკაში გახსნილი 10 საარჩევნო უბნის მეშვეობით შეძლებს. ინფორმაციას ოკუპირებულ სამხრეთ ოსეთში რუსეთის ფედერაციის ელჩი, ელბრუს კარგიევი ავრცელებს.

კარგიევის განმარტებით, 5 საარჩევნო უბანი - ცხინვალში, 1 - კვაისაში, ხოლო 4 სხვადასხვა რაიონულ ცენტრში განთავსდება. მან ასევე გაიხსენა, რომ ოკუპირებულ სამხრეთ ოსეთში რუსეთის საელჩომ 2011 წელს დუმის, ხოლო 2012 წელს საპრეზიდენტო არჩევნები უკვე ჩაატარა. მისი თქმით, ორივე მათგანი ამომრჩეველთა აქტიურობით გამოირჩეოდა.

რუსეთის პრეზიდენტის, ვლადიმერ პუტინის ბრძანებით, სახელმწიფო დუმის არჩევნები 2016 წლის 18 სექტემბერს გაიმართება.