მალხაზ მაჩალიკაშვილმა ოპოზიციური ლიდერების მიერ გამართულ აქციაზე განაცხადა, რომ გავრცელებული ხმების მიუხედავად, პანკისის ხეობაში ტერორისტები კი არა, ვაჟკაცები იზრდებიან. მაჩალიკაშვილის თქმითვე, ის ამაყია, რადგან ჩეჩნურ ადათს ქართული კულტურა შეუზავა.

"მე სრული პასუხისმგებლობით ვაცხადებ, მთლიანად პანკისის ხეობა, ქისტი მოსახლეობა, ყოველთვის იყო და იქნება ქართველი ერის გვერდით, ჭირშიც და ლხინშიც",- განაცხადა მაჩალიკაშვილმა აქციაზე და დაამატა, რომ თუ საჭიროება მოთხოვს, სისხლის ბოლო წვეთამდე იბრძოლებს.

მისივე თქმით, რელიგიური დღესასწაულის, რამადანის თვის ჩავლის შემდეგ აქციების დაანონსებას აპირებდა, სადაც საკუთარი სიმართლისთვის იდგებოდა და არ ექნებოდა მნიშვნელობა აქცია პოლიტიკურ სახეს მიიღებდა თუ არაპოლიტიკურს.

მალხაზ მაჩალიკაშვილმა აქციაზე ქართველ ხალხთან ერთად ზაზა სარალიძეს გამოუცხადა თანადგომა.

"პირველივე დღიდანვე, როცა ზაზამ გამაგებინა, რომ ჩემნაირად გამწარებული იყო, მე მას გვერდზე დავუდექი და სიტყვა მივეცი, რომ სისხლის ბოლო წვეთამდე ვიდგებოდი მის გვერდით", - ამბობს მაჩალიკაშვილი.

საქართველოს პარლამენტთან ამ წუთებში ოპოზიციური ლიდერების აქცია მიმდინარეობს. აქციის მთავარი მოთხოვნა მთავრობის გადადგომაა, დეტალურ სამოქმედო გეგმას კი ამავე აქციაზე ოპოზიციური პარტიის ლიდერები გაავრცელებენ. აქციას ამ დრომდე არ ესწრება ზაზა სარალიძე. ზვიად კუპრავას თქმით, ზაზა სარალიძემ დრო ითხოვა და აქციას მოგვიანებით შეუერთდება. აქცია გუშინ, ოპოზიციური პარტიების მიერ მას შემდეგ დაანონსდა, რაც ზაზა სარალიძემ მათ მხარდაჭერისკენ მოუწოდა.