ციანიდის საქმის მთავარი მოწმე, ჟურნალისტი ირაკლი მამალაძე, მსჯავრდებულ დეკანოზს აქამდე უცნობ ბრალდებას უყენებს და პროკურატურასა და საპატრიარქოს მისი წარსულის გამოკვლევისკენ მოუწოდებს.

მამალაძემ დღეს, 28 მაისს ბრიფინგი გამართა, სადაც განაცხადა, რომ დეკანოზი დონეცკის ოლქში, რუსულ ეკლესიაში მსახურობის დროს, "ძალიან მძიმე სექსუალურ დანაშაულში" იყო გახვეული.

მისივე მტკიცებით, დაახლოებით 2008 წელს გიორგი მამალაძე დონეცკში არასრულწლოვანს სექსუალურად ავიწროებდა, რის გამოც მსხვერპლის მამამ მას მანქანა დაუწვა.

იგი აცხადებს, რომ კითხვები აქვს პროკურატურასთანაც და საპატრიარქოსთანაც:

"რატომ არ არის დღემდე გამოკვლეული მამა გიორგის საქმიანობა დონეცკის ოლქში? რომელიც შემჩნეული კი არა, დადასტურებულია რომ ძალიან მძიმე სექსუალურ დანაშაულშია გახვეული. რა უნდოდა საპატრიარქოში ტარას შავშიშვილს? სად ბრძანდება სოსო ოხანაშვილი?"

ირაკლი მამალაძის თქმით, უკრაინის ინციდენტის შემდეგ დეკანოზს "მეორე ჯვარი მისცეს":

"ის უცებ გადმოიყვანეს თბილისში. როგორც ჩანს, ეს ადამიანი ვიღაცებთან იყო ვალში და ამის სანაცვლოდ ასრულებდა იმ ძალიან მძიმე დანაშაულს რომელშიც იქნა მხილებული".

ირაკლი მამალაძე ციანიდის საქმის მთავარი მოწმეა. პროკურატურის ცნობით, მან ვიდეოჩანაწერი, რომელიც საქმეში არსებული მტკიცებულებების ნაწილია ასახული, სასამართლოს ნებართვით ჩაიწერა.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა.

ე.წ. ციანიდის საქმე სააპელაციოში დახურულ სხდომებზე განიხილებოდა.დახურული სხდომა ნიშნავს, რომ საქმეში მონაწილე პირების, ან მათი წარმომადგენლების გარდა სხდომებს ვერავინ დაესწრო.