საქართველოს პრეზიდენტი ორმაგი მოქალაქეობის მიღების წესების გამარტივებას მიესალმება. ამის შესახებ საქართველოს პრეზიდენტმა ქართული დიასპორის დღისადმის მიძღვნილ ღონისძიებაზე განაცხადა.

პრეზიდენტის თქმით, ამ ეტაპზე ორმაგი მოქალაქეობის მიღების პროცედურების გამო პროცესი საკმაოდ ხანგრძლივია.

"როდესაც პროცედურა დადგენილია ორმაგი მოქალაქეობის და იქ რაღაც პროცედურული პროცესებია გასავლელი, ეს ბუნებრივად ანელებს ამ პროცესსა და თუ იქნება, ასე ვთქვათ, უფრო ლიბერალური მიდგომა ამ საკითხისადმი და თქვენი ორმაგი მოქალაქეობის თაობაზე პროცედურები არ იქნება იმ რთული პროცესით გასატარებელი, რომელიც ახლა არის განსაზღვრული, ჩემთვის ეს იქნება მხოლოდ სასიხარულო და მე მხარს დავუჭერდი და მივესალმები რაც შეიძლება სწრაფად ამ კანონის მიღებას",- განაცხადა საქართველოს პრეზიდენტმა ფორუმზე სიტყვით გამოსვლისას.

თბილისში, ქართული დიასპორის დღისადმი მიძღვნილი ფორუმი ძლიერი დიასპორა ერთიანი საქართველოსთვის გაიხსნა. ფორუმი საქართველოს პირველი დემოკრატიული რესპუბლიკის გამოცხადებიდან 100 წლის იუბილეს ეძღვნება.