მართალია, სექსუალურ შევიწროებაში დადანაშაულებულმა მორგან ფრიმანმა სავარაუდო მსხვერპლ ქალებს ბოდიში მოუხადა, თუმცა როგორც ჩანს ეს SAG-AFTRA-სთვის საკმარისი არ აღმოჩნდა.

იანვარში, კინომსახიობთა გილდიამ მსახიობს კარიერაში მიღწეული წარმატებისთვის ჯილდო გადასცა, თუმცა ახლა მიმდიანრეობს საუბარი საპატიო ჯილდოს ჩამორთმევასთან დაკავშირებით.

"ეს არის დამანგრეველი ბრალდებები, რომლებიც აბსოლუტურად ეწინააღმდეგება ყველა იმ ნაბიჯს, რომელსაც ჩვენ ვატარებთ უსაფრთხო ინდუსტრიული გარემოს შესაქმნელად ამ ინდუსტრიის პროფესიონალებისათვის. ჩვენ გულმოდგინედ დავაკვირდებით მორგან ფრიმანის გარშემო მიმდინარე მოვლენებს, გავიაზრებთ მსხვერპლი ქალების ისტორიებს და მხოლოდ ამის შემდეგ მივირებთ გადაწყვეტილებას", - ნათქვამია განცხადებაში.

ოსკაროსან მსახიობს, მორგან ფრიმანს სექსუალურ შევიწროებასა და შეუფერებელ საქციელში 8 ქალი ადანაშაულებს.

ერთ-ერთი ქალი, რომელიც ანონიმურობას ინარჩუნებს, ამბობს რომ 2015 წელს ფრიმანთან ერთად ფილმ Going In Style-ზე მუშაობისას შევიწროების მსხვერპლი გახდა. მისი თქმით, ფრიმანი სურვილის წინააღმდეგ ეხებოდა მას. "კაბა წამოიწია და მითხრა - შევამოწმებ გაცვია თუ არა საცვლები", - იხსენებს დაზარალებული.

CNN-ის სხვა წყაროების ინფორმაციით, ფრიმანის შეუფერებელი ქცევა მხოლოდ ამ ფილმის გადაღებებზე არ გამოჩენილა. 2012 წელს, Now You See Me-ს გადაღებებზე ფრიმანი ქალებს ხშირად ესაუბრებოდა მათ სხეულზე. ერთ-ერთი მსახიობი ქალი ამბობს, რომ ისინი ცდილობდნენ დეკოლტე არ ჩაეცვათ იმისთვის, რომ ფრიმანის კომენტარები აერიდებინათ.