საქართველოს ვიცე-პრემიერი, დიმიტრი ქუმსიშვილი ამბობს, რომ ტელეკომპანია რუსთავი 2-სა და საქართველოს მართლმადიდებელი ეკლესიის საპატრიარქოს შეუძლიათ ერთმანეთის შესახებ განცხადებები გაავრცელონ, საზოგადოება კი თავად გამოიტანს აზრს. ასე გამოეხმაურა მინისტრი საპატრიარქოს განცხადებას რუსთავი 2-სთვის ბოიკოტის გამოცხადებასთან დაკავშირებით.

"როგორც რუსთავი 2-ს, ასევე საპატრიარქოსაც შეუძლია გააკეთოს განცხადებები. ეს მათი გადასაწყვეტია. ხოლო საზოგადოებამ თვითონ უნდა მიიღოს გადაწყვეტილებები, რომელ განცხადებას როგორ უნდა მოეკიდოს", - ამბობს ქუმსიშვილი.

გუშინ, 24 მაისს, საქართველოს მართლმადიდებელი ეკლესიის საპატრიარქომ სასულიერო პირებსა და თავიანთ მხარდამჭერებს მოუწოდა რუსთავი 2-თან ურთიერთობა შეწყვიტონ. ბოიკოტის შესახებ განცხადება საპატრიარქომ გიორგი გაბუნიას 22 მაისს გასული გადაცემის შემდეგ გაავრცელა. გადაცემის თემა "ცენზურის საფრთხე" და გამოხატვის თავისუფლების შესახებ ახალი საკანონმდებლო პაკეტი იყო. წამყვანს თვალსაჩინოებისთვის სტუდიაში მიტანილი ჰქონდა მხატვარ ლია უკლებას ნახატი "თვითმკვლელი ღვთისმშობელი", რომელსაც სათამაშო პისტოლეტი უჭირავს.

საპატრიარქოს განცხადებას ტელეკომპანიის დირექტორი, ნიკა გვარამიაც გამოეხმაურა. როგორც ის On.ge-სთან საუბარში აცხადებს, "საპატრიარქოში შავ-ბნელი დაჯგუფებაა, რომელიც დღეს, სამწუხაროდ, გამოხატავს საქართველოს საპატრიარქოს აზრს, ეკლესიას აზიანებს."