"კარასინმა სერიოზული შეშფოთება გამოხატა საქართველოსა და ნატოს გაღრმავებული თანამშრომლობის გამო", - ასე აფასებს რუსეთის საგარეო საქმეთა სამინისტრო აბაშიძე-კარასინის ბოლო შეხვედრას.

რუსეთის საგარეო საქმეთა მინისტრის მოადგილის, გრიგორი კარასინისა და საქართველოს პრემიერის სპეციალური წარმომადგენლის, ზურაბ აბაშიძის შეხვედრა პრაღაში 24 მაისს გაიმართა.

რუსეთის საგარეო უწყების მიერ გავრცელებული განცხადებით, შეხვედრაზე გრიგორი კარასინმა "რუსეთისთვის პირდაპირი საფრთხე" უწოდა არარეგიონალური, გარე ძალების მიერ, ამიერკავკასიის სამხედრო გაძლიერებას.

"საქართველოს პარტნიორები ჩრდილო ატლანტიკურ ალიანსში არ მალავენ რომ ისინი იარაღით სწორედ "რუსეთის შესაკავებლად" ამარაგებენ მათ. ამ სიტუაციაში, რუსულ მხარეს უფლება აქვს ადეკვატურ ზომებს მიმართოს და გააძლიეროს რუსეთისა და მისივე მოკავშირეების უსაფრთხოება".

განცხადების თანახმად, აბაშიძე-კარასინის მომდევნო შეხვედრა 2018 წლის აგვისტოში გაიმართება.