ამერიკის პრეზიდენტმა, დონალდ ტრამპმა, ჩრდილოეთ კორეის ლიდერთან, კიმ ჩენ ინთან დაგეგმილი შეხვედრა გააუქმა. ინფორმაციას ამის შესახებ BBC ავრცელებს.

ამერიკისა და ჩრდილოეთ კორეის ლიდერების შეხვედრა 12 ივნისს სინგაპურში სპეციალური სამიტის ფარგლებში იყო დაგეგმილი. ტრამპის განცხადებით, ბოლო დროინდელი მოვლენებიდან გამომდინარე მისი შეხვედრა ჩრდილოეთ კორეის ლიდერთან უადგილო იქნება.

ამის შესახებ საუბარია ოფიციალურ წერილში, რომელიც ამერიკის პრეზიდენტმა ჩდილოეთ კორეის ლიდერს გადაუგზავნა. წერილის ასლი თეთრი სახლის ტვიტერის ოფიციალურ გვერდზე გამოქვეყნდა.

შეხვედრის გაუქმების მიზეზად დონალდ ტრამპმა კიმ ჩემ ინის ბოლოდროინდელი განცხადებები დაასახელა. მან, ასევე, მადლობა გადაუხადა ჩრდილოეთ კორეის ლიდერის ამერიკელი მძევლების გათავისუფლებისთვის და მწუხარებით აღნიშნა, რომ მსოფლიომ დაკარგა კიდევ ერთი შანსი დამყარებულიყო მშვიდობა.

ტრამპმა მოუწოდა კიმ ჩენ ინს, რომ არ შეიკავოს თავი ამერიკის პრეზიდენტთან კონტაქტისგან. დონალდ ტრამპის თქმით, დიალოგი აუცილებელია და იგი კონფლიქტის მოგვარების ყველაზე სასურველი გზაა.

"თქვენ საუბრობთ თქვენ ბირთვულ პოტენციალზე, თუმცა ჩვენი ბირთვული შეიარაღება იმდენად მძლავრი და მასიურია, რომ ჩვენ ვლოცულობთ რათა არ მოგვიხდეს ამ ძალის გამოყენება."

ბოლო თვეების განმავლობაში, ჩრდილოეთ კორეის ლიდერის რიტორიკა დასავლეთის მიმართ საგრძნობლად შერბილდა, გაიმართა კიმ ჩენ ინის და სამხრეთ კორეის ლიდერის ისტორიული შეხვედრა და ბოლო დაედო ტექნიკური ომის მდგომარეობს ორ კორეას შორის. ამ შეხვედრიდან მალევე ჩრდილოეთ კორეაში საიდუმლო ვიზიტით იყო აშშ-ს სახელმწიფო მდივანი, მაიკლ პომპეო. სწორედ ამ ვიზიტიდან მალევე, ცნობილი გახდა, რომ სინგაპურის სამიტის ფარგლებში შედგებოდა დონალდ ტრამპისა და კიმ ჩენ ინის შეხვედრა.