პარლამენტის თავმჯდომარის მოადგილე თამარ ჩუგოშვილმა შინაგან საქმეთა მინისტრის პარლამენტში მოხსენების შეფასებისას განაცხადა, რომ გიორგი გახარია ქუთაისიდან თბილისში მნიშვნელოვანი პოლიტიკური მხარდაჭერით ბრუნდება.

თამარ ჩუგოშვილის თქმით, მისთვის ყველაზე მნიშვნელოვანი იყო მოესმინა, რომ შსს-სთვის ადამიანის უფლებების დაცვა პრიორიტეტია.

"ოჯახში ძალადობის, ქალთა მიმართ ძალადობის, სიძულვილით მოტივირებული დანაშაულის მიმართ ბრძოლის საკითხებში, შინაგან საქმეთა სამინისტრო არის ისეთი ეფექტური როგორც არასდროს. ქალთა მიმართ ძალადობის სტატისტიკის ზრდა არის მაჩვენებელი არა იმის, რომ ძალადობა იზრდება, არამედ იმის, რომ პოლიცია როგორც იქნა, გახდა ეფექტური, გახდა ძლიერი და როგორც იქნა, ქალებს, ადამიანებს, რომლებიც ამ ტიპის ძალადობის ქვეშ არიან, გაუჩნდათ განცდა, რომ სახელმწიფო მათ იცავს", - განმარტა თამარ ჩუგოშვილმა სიტყვით გამოსვლის დროს.

თამარ ჩუგოშვილის განცხადებით, პოლიცია არ იცავს იმ ჯგუფებს, რომელიც მოსწონს არ მოსწონს, არამედ იცავს იმ ადამიანებს რომლებიც ემორჩილებიან კანონს და რომელებიც კანონის ფარგლებში გამოხატავენ ერთის მხრივ თავის აზრს-როგორიც არ უნდა იყოს ეს აზრი და მეორეს მხრივ, თუკი ვინმე სცდება კანონის ფარგლებს, კანონით გათვალისწინებული წესით აგებს პასუხს.

"წაიღეთ ჩვენი ნდობა, დამატებით თბილისში და წარმატებებს გისურვებთ, იმ ამბიციური გეგმების განხორციელებაში რომლებზეც თქვენ დღეს ისაუბრეთ", - განაცხადა თამარ ჩუგოშვილმა საუბრის დასასრულს.