შინაგან საქმეთა მინისტრის გიორგი გახარიას განცხადებით, ფაშისტური და ყველა სახის ტოტალიტარული იდეოლოგია ამ ქვეყანაში პრობლემაა. ასე გამოეხმაურა მინისტრი დეპუტატების კითხვებს, თუ რას გეგმავს უწყება ფაშისტურ და ნეონაცისტურ ორგანიზაციებთან დაკავშირებით, რომლებმაც ბოლო რამდენიმე დღის განმავლობაში დაძაბულობის ესკალაციას ხელი შეუწყეს, ძალადობის მოწოდებებსა და ჰომოფობიურ განცხადებებს აჟღერებდნენ.

გიორგი გახარიას განცხადებით, ქვეყნის ძირითადი კონკურენტული უპირატესობა არის პლურალიზმი და საზოგადოებამ შსს-ს სამოქმედო დრო უნდა მისცეს.

"რა თქმა უნდა, ყველაფერი, რაც საზოგადოებრივ წესრიგს უქმნის საფრთხეს, ქვეყნის და პოლიციისთვის გამოწვევაა. აბსოლუტურად ადეკვატური რეაქცია გვექნება, ოღონდ ნუ მოგვთხოვთ, რომ შესაბამისი სამართლებრივი საფეხურების გარეშე ვიღაცას ვეცეთ და რეაგირება მივცეთ", - განაცხადა გიორგი გახარიამ პარლამენტში.

მისი განმარტებით, შსს-ს ყველა ქმედება იქნება აბსოლუტურად თანმიმდევრული და თუ საკანონმდებლო ცვლილებები გახდება საჭირო პარლამენტს მიმართავენ.