შინაგან საქმეთა მინისტრის მოადგილის, ნათია მეზვრიშვილი განცხადებით, ბასიანსა და გალერიში ნარკოტიკული საშუალებები იყიდებოდა და პოლიციის მიერ საგამოძიებო მოქმედებების ჩატარება ლეგიტიმური იყო. მისივე განმარტებით, პოლიცია მოქმედებდა კანონის ჩარჩოებში.

"მაქვს კითხვა, ნებისმიერი ნორმალური პოლიციელი და სამართალდამცავი, რომელსაც აქვს დადასტურებული ინფორმაცია, რომ კლუბებში ნარკოტიკულ საშუალებებს ყიდიან უნდა ჩაეტარებინა თუ არა საგამოძიებო მოქმედება-ჩხრეკა. პასუხი არის ერთადერთი და ცალსახა: დიახ, ჩხრეკა უნდა ჩატარებულიყო", - განაცხადა მინისტრი მოადგილემ.

მისივე თქმით, კლუბებში სპეცოპერაცია არ ჩატარებულა და ეს იყო საგამოძიებო მოქმედება-ჩხრეკა. ამავე დროს თვითონ შინაგან საქმეთა მინისტრი, გიორგი გახარია კლუბებში განვითარებულ მოვლენებს სპეცოპერაციას უწოდებს.

12 მაისს, დაახლოებით ღამის 12 საათზე თბილისის ორ ღამის კლუბში, ბასიანსა და გალერიში სპეცოპერაცია ერთდროულად დაიწყო. შინაგან საქმეთა სამინისტრო გავრცელებულ განცხადებაში აღნიშნული იყო, რომ სპეცოპერაციას წინ 3-თვიანი საგამოძიებო მოქმედებები უძღვოდა და მათ ნარკორეალიზების ბრალდებით რვა პირი დააკავეს.

სპეცოპერაციისას კლუბების სტუმრები გარეთ გაიყვანეს. კლუბ ბასიანთან დაპირისპირება იყო სამართალდამცავებსა და მოქალაქეებს შორის. დაპირისპირება გაგრძელდა პარლამენტთან, იმავე ღამეს ჩატარებულ საპროტესტო აქციაზე. აქცია "ჩვენი თავისუფლებისთვის" გაგრძელდა მომდევნო დღეებშიც.

გაიგეთ მეტი: