თეთრი ხმაურის მოძრაობის ლიდერმა ბექა წიქარიშვილმა განაცხადა, რომ შს მინისტრთან, გიორგი გახარიასთან მოლაპარაკებები მიმდინარეობს და შესაძლოა, რომ ყველა მათი მოთხოვნა შესრულდეს.

ბოლო ორი დღის განმავლობაში აქციის მონაწილეები 12 მაისის სპეცოპერაციასთან დაკავშირებით დეტალურ ინფორმაციას ითხოვენ. ასევე, მათი მოთხოვნაა რომ მოხდეს ნარკოპოლიტიკის ლიბერალიზაცია.

შს მინისტრმა ტელე იმედის ეთერითა განაცხადა, რომ მზად არის პარლამენტთან მივიდეს, აქციის მონაწილეებს შეხვდეს და 12 მაისის სპეცოპერაციასთან დაკავშირებით ყველა კითხვას უპასუხოს.

პარლამენტთან აქცია "ჩვენი თავისუფლებისთვის" ორგანიზატორები 12 მაისის მოვლენების შემდეგ პრემიერ-მინისტრისგან კითხვებზე პასუხის გაცემას ითხოვენ.

პრემიერმა, გიორგი კვირიკაშვილმა 13 მაისს საგანგებო ბრიფინგზე სპეცოპერაციასთან დაკავშირებით განმარტება არ გააკეთა. მან საზოგადოებას გაერთიანებისკენ მოუწოდა.

12 მაისს გვიან ღამით კლუბ ბასიანსა და კაფე გალერიში სპეცოპერაცია ჩატარდა. შინაგან საქმეთა სამინისტროს განცხადებით, მათ რვა ნარკორეალიზატორი დააკავეს. სპეცოპერაციის პარალელურად დაპირისპირება იყო პოლიციასა და მოქალაქეებს შორის. ადმინისტრაციული წესით დააკავეს 50-მდე პირი, ისინი გუშინ დილითვე გაათავისუფლეს.

სპეცოპერაციაზე განცხადება გააკეთა თბილისის მერმა, კახა კალაძემ. მისი თქმით, სპეცოპერაცია ღამის ეკონიმიკას და კლუბურ მუსიკას ზიანს არ მიაყენებს.