შინაგან საქმეთა სამინისტრომ On.ge-ს დაუდასტურა, რომ 12 მაისს გვიან ღამით ადმინისტრაციული წესით დაკავებული ყველა პირი გათავისუფლებულია. დაკავებულთა ზუსტი რიცხვი ამ დროისთვის უცნობია.

უწყების საგანგებო ბრიფინგზე, განაცხადეს, რომ სისხლის სამართლი წესით ნარკორელიზატორობის ბრალდებით რვა პირი დააკავეს.

ბასიანსა და კაფე გალერიში ჩატარებულ სპეცოპერაციასთან დაკავშირებით ბრიფინგი გამართა.

უწყების თქმით, ისინი ბოლო 3 თვის განმავლობაში ინტენსიურ ოპერატიულ-სამძებრო და საგამოძიებო მოქმედებებს ახორციელებდნენ თბილისში მდებარე კლუბებში. მათივე თქმით, ნარკორეალიზატორთა გამოსავლენად კლუბებში არაერთი საკონტროლო შესყიდვა განხორციელდა.

შსს-ს განმარტებით, სპეცოპერაცია იმ დროს დაიწყო, როდესაც კლუბებში ნარკოტიკული საშუალებების გასაღება უნდა მომხდარიყო.

უწყების განმარტებით, კლუბის არც ერთი სტუმარი სისხლის სამართლის წესით დაკავებული არ არის:

"კლუბებში მყოფ პირებს პოლიციის მიერ განემარტათ, რომ თუ ისინი ნებაყოფლობით ჩააბარებდნენ ნარკოტიკულ საშუალებებს, სისხლის სამართლის კოდექსის 260-ე მუხლის საფუძველზე, სისხლისსამართლებრივი პასუხისმგებლობისგან გათავისუფლდებოდნენ. პოლიციის მოწოდების შესაბამისად, პირთა გარკვეულმა ნაწილმა კლუბში დატოვა ნარკოტიკული საშუალებები, რომლებზეც ამჟამად დანიშნულია ექსპერტიზები. აღნიშნული პირები, კლუბში მყოფ სხვა პირებთან ერთად, პოლიციის მიერ გაყვანილ იქნენ კლუბის შენობიდან. არც ერთი მათგანის მიმართ პირადი გასინჯვა ან ჩხრეკა არ განხორციელებულა. " - განაცხადეს ბრიფინგზე.

უწყების განმარტებით, ზურაბ გელბახიანის შესაძლო ცემასთან დაკავშირებული ინფორმაცია სიცრუეა.

"ხაზგასმით აღვნიშნავთ, რომ შინაგან საქმეთა სამინისტრო მხარს უჭერს საქართველოში კლუბური კულტურის განვითარებას, თუმცა, ამავდროულად, შეურიგებელ ბრძოლას უცხადებს ნარკოტიკული საშუალებების გასაღებას, მათ შორის, კლუბებში. შესაბამისად, ცალკეული კლუბის მიერ ფუნქციონირების გაგრძელების საკითხის გადაწყვეტა აღნიშნული კლუბის მეპატრონეების კომპეტენციაა", - ნათქვამია უწყების განცხადებაში.