აშშ-ის პრეზიდენტის, დონალდ ტრამპისა და ჩრდილოეთ კორეის ლიდერის, კიმ ჩენ ინის პირველი სამიტი სინგაპურში გაიმართება. ამის შესახებ CNN წყაროებზე დაყრდნობით წერს.

მანამდე, დონალდ ტრამპმა განაცხადა, რომ ისტორიული შეხვედრის ადგილი და დრო რამდენიმე დღეში გახდებოდა ცნობილი. თუმცა CNN ორ წყაროზე დაყრდნობით წერს, რომ ადმინისტრაციის მაღალჩინოსნებს სინგაპურში შეხვედრის ორგანიზების დავალება უკვე მისცეს.

9 მაისს პრეზიდენტმა განაცხადა, რომ სახელმწიფო მდივანი, მაიკ პომპეო ჩრდილოეთ კორეაში სამიტის დაგეგმვისათვის გაემგზავრა. პომპეო შტატებში ფხენიანში დაკავებულ სამ მოქალაქესთან ერთად დაბრუნდა.

სახელმწიფო მდივანმა ჟურნალისტებს განუცხადა, რომ სამიტის დრო შეთანხმებულია, თუმცა დეტალები უახლოეს მომავალში გასაჯაროვდებოდა.

ჩრდილოეთ კორეის ლიდერი კიმ ჩენ ინი უკვე ორჯერ შეხვდა ჩინეთის პრეზიდეტ სი ძინპინს. როგორც ცნობილია, მათ ქვეყნებს შორის ურთიერთობებზე ისაუბრეს.

ისტორიული შეხვედრა გაიმართა ჩრდილოეთ და სამხრეთ კორეის ლიდერებს შორის. 1953 წლის შემდეგ ის იყო პირველი შემთხვევა, როდესაც ჩრდილოეთ კორეის ლიდერი სამხრეთ კორეის ტერიტორიაზე გადავიდა. ორივე კორეის ლიდერები ნახევარკუნძულის ბირთვულ განიარაღებაზე შეთანხმდნენ. მათ, ასევე, პირობა დაადეს, რომ კორეის ომი მიმდინარე წელს დასრულდება.