კორეის გაყოფიდან 65 წლის გასვლის შემდეგ ჩრდილოეთ კორეის ლიდერი სამხრეთ კორეაში პირველად ჩავიდა.

კიმ ჩენ ინი ჩრდილოეთ კორეის პირველი ლიდერია, რომელმაც დემილიტარიზებული საზღვარი გადაკვეთა და სამხრეთ კორეის ტერიტორიაზე პრეზიდენტ მუნ ჯეი ინს შეხვდა.

ფხენიანის ლიდერმა მუნ ჯეი ინთან შეხვედრას ისტორიული უწოდა.

სამიტის დაწყებამდე ორივე კორეის ლიდერებმა ერთმანეთს ხელი ჩამოართვა, რაც, დაახლოებით, 30 წამი გაგრძელდა. ამ დროს ორივე მათგანი საზღვრის თავის მხარეს იდგა. მათ შორის ხანმოკლე დიალოგი გაიმართა, რის შემდეგაც მუნ ჯეი ინის მიწვევით კიმ ჩენ ინი სამხრეთ კორეის ტერიტორიაზე გადავიდა.

ამის შემდეგ კიმმა მუნი ჩრდილოეთ კორეის ტერიტორიაზე ხელჩაკიდებულმა გადაიყვანა და რამდენიმე წამის შემდეგ ორივე მათგანი ისევ სამხრეთ კორეის ტერიტორიაზე დაბრუნდა და დემილიტარიზებულ ზონაში მშვიდობის სახლისკენ წავიდა, სადაც ისტორიული სამიტი გაიმართა. ამ ხნის განმავლობაში ისინი ხელჩაკიდებულები იყვნენ.

ისტორიული შეხვედრა

"დღეს ისტორიის ახალი თავი იწყება - ისტორიის დასაწყისი და მშვიდობის ეპოქა", - დაწერა კიმ ჩენ ინმა სტუმრების წიგნში.

ფოტო: Getty

როგორც მედიაში წერენ, კიმ ჩენ ინმა განაცხადა, რომ ბალისტიკური რაკეტების გამოცდით მუნ ჯეი ინის "დილის ძილს აღარ დაარღვევს". მან, ასევე, დაამატა, რომ გულახდილი მოლაპარაკებების იმედი აქვს.

"ამ ისტორიული მომენტისთვის 11 წელი დაგვჭირდა. აქ რომ მოვდიოდი, მიკვირდა, რატომ დასჭირდა ამას ამდენი ხანი", - განაცხადა ფხენიანის ლიდერმა.

მედიის წინაშე გაკეთებული განცხადებების შემდეგ სამიტი დახურულ კარს მიღმა გაგრძელდა. ოთახი, რომელშიც შეხვედრა მოეწყო სპეციალურად კიმ ჩენ ინის ვიზიტისთვის გარემონტდა.

შეხვედრის დროს მხარეებმა დენუკლიარიზაციის საკითხები განიხილეს. კიმ ჩენ ინმა სამომავლო შეხვედრების სურვილიც გამოთქვა. მუნ ჯეი ინმა განაცხადა, რომ მათ შორის საკმაოდ კარგი დისკუსია გაიმართა.

დელეგაციის პირველი შეხვედრა დასრულდა და მხარეები სასადილოდ ცალ-ცალკე წავიდნენ. სამიტი დღეს საღამოს გაგრძელდება. საღამოს კი სადილი გაიმართება, რომელსაც ორივე კორეის ლიდერების ცოლები დაესწრებიან.

კიმ ჩენ ინი დილის შეხვედრას ტოვებს

კიმ ჩენ ინისა და მუნ ჯეი ინის შეხვედრა ორი კორეის ურთიერთობების დარეგულირებისთვის კულმინაციური მომენტია. სავარაუდოდ, სწორედ ეს შეხვედრა შეუწყობს ხელს აშშ-სა და ჩრდილოეთ კორეის სამიტს.