თეთრი ხმაურის მოძრაობა განცხადებას ავრცელებს, სადაც ნათქვამია, რომ რამდენიმე წუთის წინ მიღებული ინფორმაციით, დღეს, 5 მაისს კიდევ 2 ახალგაზრდა ადამიანი გარდაიცვალა საკუთარ სახლში მოხმარების შემდგომი ძილის პერიოდში:

"თითოეულ გარდაცვლილ ადამიანზე პასუხისმგებლობას ვაკისრებთ სახელმწიფოს, რომელიც არათუ არაფერს აკეთებს ვითარების ცვლილებისთვის, არამედ ხმასაც არ იღებს შექმნილ საგანგაშო მდგომარეობაზე".

თეთრი ხმაური აცხადებს, რომ შავ ბაზარზე შემოსულია ნარკოტიკული საშუალებები, რომლებიც სიცოცხლისთვის საშიშია. მოძრაობა ეჭვობს, რომ ეს ხდება მიზანმიმართულად:

"სისტემა გვიმეტებს სიკვდილისთვის".

თეთრი ხმაურის მოძრაობა მოუწოდებს ყველა ადამიანს, ვინც მოიხმართ ნარკოტიკულ საშუალებებს, შეწყვიტონ და ნებისმიერ ფასად თავი შეიკავონ ნებისმიერი სუბსტანციის მიღებისგან:

"ვვარაუდობთ, რომ არა მხოლოდ ე.წ მეფედრონია ლეტალობის მიზეზი, არამედ ყველა სხვა ნარკოტიკული საშუალებაც განგებაა დაბინძურებული დღემდე უცნობი ნივთიერებით (კლინიკური ნიშნებიდან გამომდინარე შესაძლოა ეს იყოს ბიო-ჰეროინი იგივე ფენტალინი)".

შინაგან საქმეთა სამინისტროს განცხადებით, დღეს, 5 მაისს, თბილისში, ბახტრიონის ქუჩაზე საცხოვრებელ ბინაში გარდაცვლილი ნახეს 1979 წელს დაბადებული პირი. მათივე ცნობით, შეტყობინება მიიღეს ასევე მარჯანიშვილის ქუჩაზე, საცხოვრებელ ბინაში 1980 წელს დაბადებული პირის გარდაცვალებასთან დაკავშირებითაც.

გასულ კვირას შინაგან საქმეთა სამინისტრომ დაადასტურა, რომ აპრილის ბოლოს ორი ადამიანი იპოვეს სახლში გარდაცვლილი. სავარუდოდ, ორივე მათგანი ნარკოტიკული საშუალების ზედოზირების შედეგად დაიღუპა. ამჟამად, დანიშნულია ექსპერტიზა, რაც დაადგენს გარდაცვალების ზუსტ მიზეზს.