ნობელის პრემიის კომიტეტმა განაცხადა, რომ 2018 წელს ლიტერატურის დარგში პრემიას არ გასცემს. გადაწყვეტილება შვედეთის კომიტეტის გარშემო არსებული სექსუალური სკანდალის ფონზე მიიღეს. ინფორმაციას ამის შესახებ The Guardian ავრცელებს.

როგორც ცნობილია, გადაწყვეტილება სხვა დარგებს არ შეეხებათ. ლიტერატურის დარგში ნობელის პრემიის გადაცემა 2019 წელს განახლდება და ერთდროულად ორი ლაურეატი გამოცხადდება - 2018 და 2019 წლებისთვის.

"შვედეთის აკადემიის კრიზისი ნობელის პრემიაზე უარყოფითად აისახა. ეს გადაწყვეტილება, რომელიც სიტუაციის სერიოზულობას ასახავს, რეპუტაციის შენარჩუნებას დაეხმარება", - ნათქვამია განცხადებაში.

2017 წლის ბოლოს შვედეთის აკადემიამ, რომელიც ლიტერატურის დარგში პრემიის გაცემაზეა პასუხისმგებელი, ინფორმაციის გაჟონვის გამო შიდა გამოძიება დაიწყო.

როგორც შვედური პრესა წერს, საქმეში ეჭვმიტანილი არის 71 წლის ფოტოგრაფი და რეჟისორი ჟან-კლოდ არნო, რომელიც შვედეთის აკადემიის წევრისა და პოეტის, კატარინა ფროსტენსონის ქმარია.

სავარაუდოდ, არნო სისტემატიურად გასცემდა ლიტერატურის დარგში მომავალი ლაურეატების ვინაობას და, ასევე, ამბობდა ვინ იქნებოდა შვედეთის აკადემიის ახალი წევრი. არნო ყველა ბრალდებას უარყოფს.

გარდა ამისა, წინა წლის ნოემბერში 18-მა ქალმა არნო სექსუალურ შევიწროებაში დაადანაშაულა. როგორც ქალები ამბობენ, შევიწროების რამდენიმე შემთხვევა აკადემიის კუთვნილ შენობებში ხდებოდა. არნო ყველა ბრალდებას უარყოფს.

სექსუალური შევიწროების სკანდალიდან მალევე, აკადემიამ ორგანიზაციიდან კატარინა ფროსტენსონის გარიცხვას კენჭი უყარა. სკანდალი ფონზე 2018 წლის აპრილში აკადემიის მუდმივმა მდივანმა, სარა დანიუსმა თანამდებობა დატოვა.

ლიტერატურის დარგში ნობელის პრემიის გადაცემა ბოლოს მეორე მსოფლიო ომის გამო 1943 წელს გადაიდო.