პარია გირჩის წევრმა და ბიბლიური თავისუფლების მთავარმა მღვდელმსახურმა, ნიკა ობოლაძემ პოლიციის შენობა დატოვა. ამის შესახებ On.ge-ს ჟურნალისტი ადგილიდან იტყობინება.

შსს-ს განცხადებაში ვკითხულობთ, რომ ნარკოტიკული საშუალების შემცველი მცენარის უკანონო დათესვა, მოყვანა ან კულტივირების მიმდინარე გამოძიების ფარგლებში პარტია გირჩის წევრი ნიკა ობოლაძე გამოავლინეს.

უწყება აცხადებს, რომ პოლიციამ სავარაუდო ნარკოტიკული საშაულება კანაფი ნივთმტკიცებად ამოიღო. ნიკა ობოლაძე განყოფილებაში მოწმის სტატუსით დაიკითხა.

შსს-ს ცნობით, გამოძიება სისხლის სამართლის კოდექსის 265-ე მუხლით მიმდინარეობს.

დღეს, 2 მაისს, თბილისში, ქავთარაძის ქუჩაზე, გირჩის ოფისის მახლობლად, სამოქალაქო ფორმით მისულმა შსს-ს თანამშრომლებმა ერთი პირი ნარკოდანაშაულის ბრალდებით დააკავეს.

გირჩის წევრების ცნობით, მათ ფანჯრიდან დაინახეს, რომ პირი ძირს დააწვინეს და ამ ფორმით ცდილობდნენ დაეკავებინათ. მათივე ინფორმაციით, შსს-ს წარმომადგენლები აცხადებდნენ, რომ მათ ოპერატიული ინფორმაციის საფუძველზე უნდა გადაეყვანათ ის ნარკოტესტირებაზე.

უწყების განმარტებით, ის ნარკოტიკული საშუალების გასაღების მიზნის გარეშე, მცირე ოდენობით უკანონოდ შეძენა-შენახვის და მოხმარების მუხლით დააკავეს.

როგორც On.ge-ს ჟურნალისტი ადგილიდან იუწყება, დაკავებული პირი განყოფილებიდან გამოიყვანეს და ნარკოტესტირებაზე გადაიყვანეს. ის უარს აცხადებს ბიოლოგიური მასალის ჩაბარებაზე.

პოლიციის შენობასთან მისულმა გირჩის წევრებმა ქოთანი მიიტანეს, რომელშიც, როგორც თავად ამბობენ, მარიხუანაა დარგული. ცოტა ხნის შემდეგ, შენობიდან გამოსულმა პოლიციელმა ახსნა-განმარტების გარეშე, განყოფილებაში შეიყვანა ნიკა ობოლაძე, რომელსაც ხელში ქოთანი ეჭირა. გირჩის წევრები ამბობდნენ, რომ ობოლაძე მარიხუანიანი ქოთნის გამო დააკავეს, რომელიც ყველას ეკუთვნოდა.

შესწორება: მასალის თავდაპირველ ვესიაში ეწერა, რომ ნიკა ობოლაძე გაათავისუფლეს, რაც მოგვიანებით დაზუსტდა.