"მეტრო გაიხსნება თუ არა, ამ გადაწყვეტილებას ვიღებ მე და დედაქალაქის მთავრობა. მინდა მკაფიოდ განვუცხადო ყველას, რომ მეტრო იმუშავებს როგორც 3 მაისს, ისე ნებისმიერ დღეს და მოემსახურება ქალაქის მოსახლეობას", - ასე გამოეხმაურა თბილისის მერი კახა კალაძე მეტროს მემანქანეების დაანონსებულ გაფიცვას.

კალაძე ამბობს, რომ ის პატივს სცემს თითოეული დასაქმებულის შრომას, თუმცა მისთვის მიუღებელია, როცა დასაქმებულები და პროფესიული კავშირის წევრები სატრანსპორტო კომპანიისა და მუნიციპალიტეტის სახელით, ულტიმატუმის ენით ელაპარაკებიან მერიას:

"მე არასოდეს მივუდგები ინდივიდუალურად თანამშრომელთა რომელიმე კონკრეტულ ჯგუფს და არ მივიღებ მხოლოდ მათთვის მისაღებ გადაწყვეტილებებს. ეს ვერ და არ მოხდება. ჩემ მიერ მიღებული გადაწყვეტილებები, ყოველთვის გაითვალისწინებს მთლიანად მუნიციპალიტეტის მასშტაბით დასაქმებულ თანამშრომლებს და ქალაქის მოსახლეობას".

თბილისის მერი ამბობს, რომ კარგად აქვს გაცნობიერებული და გააზრებული მემანქანეთა შრომა, თუმცა ის დამოკიდებულება და მიდგომები, რაც ჩვენ ბოლო დღეების განმავლობაში გაჟღერდა, მისთვის მიუღებელია.

კახა კალაძის თქმით, დასაქმებულებს შეუძლიათ ისაუბრონ საკუთარ გადაწყვეტილებებზე და განსახორციელებელ ღონისძიებებზე, თუ ის არ ეწინააღმდეგება კანონს, მაგრამ მეტროს მუშაობასთან დაკავშირებით გადაწყვეტილებას მერი დედაქალაქის მთავრობასთან ერთად მიიღებს.

მეტროს მემანქანეების განცხადებით, იმის გამო, რომ სატრანსპორტო კომპანიასთან ხელფასების ზრდის საკითხზე შეთანხმებას ვერ მიაღწიეს, 3 მაისიდან გაიფიცებიან.

3 მაისიდან მეტრო აღარ გაიხსნება - მემანქანეები