ფეისბუქი მესენჯერის საბავშვო ვერსიას "ძილის" ღილაკს დაუმატებს, რაც მშობლებს საშუალებას მისცემს, თავად მართონ ბავშვების წვდომა აპლიკაციასთან.

კომპანია ამბობს, რომ მშობლებს შეეძლებათ ბავშვებს შეზღუდვები დაუწესონ, მაგალითად, გაუთიშონ მესენჯერი სკოლის დღეებში 9 საათის შემდეგ.

ფეისბუქმა აპლიკაციის საბავშვო ვერსია 13 დეკემბერს გამოუშვა. სტანდარტული მესენჯერისგან განსხვავებით, ამ ვარიანტში ვერ ნახავთ რეკლამებს, მშობლებს კი გაზრდილი უფლებებით შეუძლიათ სარგებლობა. კომპანიის გადაწყვეტილება ფსიქოლოგების ერთმა ნაწილმა ღიად გააკრიტიკა: მათი აზრით, სპეციალურად ბავშვებისთვის აპლიკაციის გამოშვება არაეთიკურია.

ფეისბუქი აცხადებს, რომ ზუსტად აცნობიერებს თანამედროვე ტექნოლოგიებთან არასრულწლოვანი მომხმარებლების ურთიერთობის საფრთხეებს და ნაბიჯებსაც სწორედ ამ საფრთხეების გათვალისწინებით დგამს.