რელიგიათა საბჭოს წევრები აცხადებენ, რომ სახელმწიფო არ იჩენს ნებას, რელიგიური ნაგებობები ისტორიულ მესაკუთრეებს დაუბრუნოს. საბჭოს განცხადებაში ნათქვამია, რომ თანდოიანცის ეკლესიის საკითხი რელიგიური გაერთიანებებისთვის საბჭოთა პერიოდში ჩამორთმეული ქონების რესტიტუციის გადაუჭრელი პრობლემის ნაწილი და თვალსაჩინო მაგალითია.

"ძეგლების დიდი ნაწილი ინგრევა, იცვლება მათი იერსახე, იშლება არაერთი რელიგიური ჯგუფის უმნიშვნელოვანესი კვალი საქართველოს ისტორიაში და ირღვევა მრავალფეროვნებით მდიდარი ქართული კულტურის მთლიანობა", - ნათქვამია განცხადებაში.

2017 წელს სახელმწიფომ სომხური ტაძარი საკუთრებით გადასცა საქართველოს მართლმადიდებელ ეკლესიას. რელიგიათა საბჭოს ცნობით, არაერთი ისტორიული წყარო და ფაქტი ადასტურებს, რომ საბჭოთა ოკუპაციამდე ნაგებობა სომეხთა სამოციქულო ეკლესიას ეკუთვნოდა.

რელიგიათა საბჭო მიმართავს საქართველოს ხელისუფლებას:

• დაუყოვნებლივ შეწყდეს თანდოიანცის ეკლესიაზე მიმდინარე ზემოქმედება;
• სამართლიანად გამოიკვლიოს აღნიშნული ეკლესიის ისტორია და უზრუნველყოს მისი სომეხთა სამოციქულო ეკლესიის ეპარქიისათვის დაბრუნება;
• უმოკლეს დროში გადადგას რეალური ნაბიჯები რელიგიური გაერთიანებებისთვის საბჭოთა პერიოდში ჩამორთმეული ისტორიული საკუთრების დასაბრუნებლად;
• ხელი შეუწყოს საქართველოს სიმდიდირის - რელიგიური, ეთნიკური და კულტურული მრავალფეროვნების შენარჩუნებას და წარმოჩენას;
• მოუფრთხილდეს საქართველოს კულტურულ მემკვიდრეობას და მის თვალსაჩინო ნაწილს - სხვადასხვა კონფესიების საკულტო ნაგებობებს.

საქართველოს სახალხო დამცველთან არსებული რელიგიათა საბჭოს წევრი რელიგიური გაერთიანებები:

1. ლათინ კათოლიკეთა კავკასიის სამოციქულო ადმინისტრაცია
2. სომეხთა კათოლიკე ეკლესია;
3. ევანგელურ-ლუთერული ეკლესია;
4. ევანგელურ-ბაპტისტური ეკლესია;
5. სახარების რწმენის ეკლესია;
6. სომეხთა სამოციქულო წმინდა მართლმადიდებელი ეკლესიის საქართველოს ეპარქია
7. მეშვიდე დღის ქრისტიან-ადვენტისტთა ეკლესია
8. ეზიდთა სასულიერო საბჭო;
9. ევანგელური ეკლესია “სიცოცხლის სიტყვა”;
10. ქართველ მუსლიმთა კავშირი;
11. სრულიად საქართველოს მუსლიმთა უმაღლესი სასულიერო სამმართველო;
12. ხსნის არმია;
13. საქართველოს კრიშნას ცნობიერების საერთაშორისო საზოგადოება;
14. წმინდა სამების პროტესტანტული ეკლესია;
15. დახსნილ ქრისტიანთა საღვთო ეკლესია;
16. მეგობართა საზოგადოება - კვაკერები;
17. სვედენბორგიანული საზოგადოება საქართველოში;
18. ევანგელური ეკლესია "ურყევი საფუძველი".