აღსრულების ეროვნულმა ბიურომ სასამართლოს გადაწყვეტილება ვერ აღასრულა და დანაშაულის პრევენციის ცენტრიდან გათავისუფლებული თანამშრომლები, ანა სუბელიანი და თამაზ ახობაძე თანამდებობებზე ვერ დაბრუნდნენ. ორივე მათგანი მიიჩნევს, რომ თანამდებობიდან საქართველოს იუსტიციის მინისტრის, თეა წულუკიანის გადაწყვეტილებით გათავისუფლდნენ.

"მიმართა მან [აღმასრულებელმა] მოვალე ორგანიზაციას და მოითხოვა დაუყოვნებლივ აღსრულება, თუმცა იმ გარემოების გათვალისწინებით, რომ მითითებული პოზიცია 2015 წლიდან აღარ არსებობს სსიპ დანაშაულის პრევენციის ცენტრში, აღმასრულებელი მოკლებულია სხვა რაიმე ქმედითი ღონისძიების განხორციელების შესაძლებლობას", - აღნიშნულია აღსრულების ბიუროს მიერ დანაშაულის პრევენციის ცენტრიდან უკანონოდ გათავისუფლებული თანამშრომლებისთვის მიწერილ წერილში.

წერილის ასლი, რომელიც ანა სუბელიანმა On.ge-ს გამოუგზავნა, ასევე აღნიშნულია, რომ სასამართლოს მიერ დაკისრებული განაცდურის გადახდის პირობაზე მხარეები ვერ შეთანხმდნენ. სუბელიანის თქმით, ისინი თანხის სრულად გადახდასა და თანამდებობაზე აღდგენას ითხოვდნენ, იუსტიციის სამინისტროს კი განაცდურის გადანაწილებით გადახდა სურდა.

"აღსრულების ეროვნული ბიუროს მიერ განხორციელდა კანონით გათვალისწინებული ყველა შესაძლო სააღსრულებო მოქმედება სააღსრულებო ფურცლით გათვალისწინებული მოთხოვნის აღსასრულებლად, როგორც თანამდებობაზე აღდგენის, ასევე იძულებითი განაცდურის ანაზღაურების ნაწილში, თუმცა არსებული ობიექტური გარემოებები გათვალისწინებით შეუძლებელია სააღსრულებო ფურცლის საფუძველზე სააღსრულებლო წარმოების განხორციელება", - აღნიშნულია სუბელიანისთვის მიწერილ წერილში.

რატომ არ აღადგინა იუსტიციის მინისტრმა გათავისუფლებულები სამსახურში On.ge ამ საკითხზე უწყებიდან პასუხს ელოდება.

2014 წელს ანა სუბელიანი და თამაზ ახობაძე სამსახურიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

ამავე თემაზე: