საქართველო–თურქეთის სასაზღვრო გამშვები პუნქტი სარფში საქართველოს მოქალაქეებისთვის რამდენიმე წუთის წინ გაიხსნა. ინფორმაციას ამის შესახებ საქართველოს შინაგან საქმეთა საინისტრო ავრცელებს. თურქეთის ინიციატივით, ტურისტული მიმოსვლა შეჩერებული რამდენიმე საათით იყო. საბაჟო გახსნილი იყო მხოლოდ თურქი მოქალაქეებისთვის, რომლებიც თურქეთის ტერიტორიაზე გადადიოდნენ და ქართველებისთვის, რომლებიც ქვეყანაში ბრუნდებოდნენ.

სარფი, 16 ივლისი, 2016.

ფოტო: თამუნა გეგიძე/On.ge

თურქეთში გადამსვლელთა მცირერიცხოვანი ჯგუფი ამ დრომდე ელოდებოდა საზღვრის გახსნას. მათმა ნაწილმა მოახერხა კონტროლის გავლა საზღვრის დაკეტვამდე, მაგრამ სასაზღვრო ზონაში დარჩათ ავტომობილები. მესაზღვრეები არ ფლობდნენ ინფორმაციას იმის შესახებ, თუ როდის აღდგებოდა მოძრაობა.

On.ge ქვეყანაში დაბრუნებულ ქართველ ტურისტებს გაესაუბრა. მათი ინფორმაციით, ანკარასა და სტამბოლში დაძაბული ვითარებაა. უამრავი დაშავებულია საავადმყოფოებში, დაკავებულია აჯანყებული სამხედროების ნაწილი. ისინი დაზარალებულ ქართველებზე ინფორმაციას არ ფლობენ.

ანკარადან მომავალმა მოქალაქემ განაცხადა, რომ ქალაქში არეულობა იყო, რის გამოც სხვადასხვა დაწესებულებებში მუშაობა შეწყდა და ის დროებით სამსახურიდან დაითხოვეს, მას საქართველოში მოუწია დაბრუნება.

სარფი, 16 ივლისი, 2016.

ფოტო: თამუნა გეგიძე/On.ge

საქართველოს მოქალაქე თამუნა დევაძემ On.ge-ის განუცხადა, რომ მათ დაბრუნებისას არანაირი პრობლემა არ შექმნიათ:

„მართალია, ახლომდებარე ქალაქებში ხმაური შეინიშნებოდა, მაგრამ ძირითადად სიმშვიდე იყო. მოსახლეობა ქუჩაში გამოვიდა ხელისუფლების მხარდასაჭერად, დროშებით და შეძახილებით მოძრაობდნენ, ამ ქალაქებში სამხედროები არ შეგვინიშნავს. ჩვენ მშვიდობიანად ვიმგზავრეთ. სასაზღვრო კონტროლის გავლის დროსაც არ შეგვქმნია პრობლემა."

15 ივლისს, ღამით, თურქეთში, სამხედრო გადატრიალების მცდელობა იყო. ბოლო მონაცემებით, სამხედროთა ჯგუფის მიერ ხელისუფლების დამხობის მცდელობას მინიმუმ 160 ადამიანი ემსხვერპლა, 1 400–ზე მეტი დაშავდა, დაკავებულია სულ მცირე 750 პირი, მათი უმრავლესობა კი სამხედროები არიან. დაკავების ოპერაცია ამ დრომდე გრძელდება.