ანკარასა და სტამბოლში 15 ივლისს დაწყებული ხელისუფლების გადატრიალების მცდელობის მიუხედავად, თურქეთის კურორტებზე, სადაც საქართველოს მოქალაქეებიც იმყოფებიან, სიმშვიდეა.

ანტალიასთან ახლოს, ქემერში დასასვენებლად იმყოფება ანა ჭიჭინაძე, რომელმაც On.ge-ს განუცხადა, რომ დაძაბულობა საერთოდ არ იგრძნობა:

"საქართველოდან შეშინებული მეგობრები რომ არ შეგვხმიანებოდნენ, საერთოდ ვერ გავიგებდით, რომ რამე ხდება. სიმშვიდეა, ყველაფერი ისეა, როგორც ეს წინა დღეებში იყო. აქაურობის დატოვებაზე არ ვფიქრობთ, ვაგრძელებთ დასვენებას".

მიუხედავად იმისა, რომ თურქეთის ხელისუფლებამ სტრატეგიული ობიექტების დიდ ნაწილზე, მათ შორის ხიდებზე, ტელევიზიებსა და პარლამენტზე, საფრთხე ბოლომდე განეიტრალებული არ არის. როიტერის ინფორმაციით, შეტაკებები ამ დრომდე გრძელდება ანკარაში, მთავარი სამხედრო შტაბ-ბინის მიმდებარე ტერიტორიაზე, სადაც გამაგრებულია ამბოხებულთა ნაწილი.

ბოლო მონაცემებით, სამხედროთა ჯგუფის მიერ ხელისუფლების დამხობის მცდელობას 160 ადამიანი ემსხვერპლა, 1 000–ზე მეტი დაშავდა, დაკავებულია 750–ზე მეტი პირი, მათი უმრავლესობა კი სამხედროები არიან.

საქართველოს მოქალაქეებისთვის, ჯერჯერობით, თურქეთის მიმართულებით გადაადგილება შეზღუდულია. საქართველოს მთავრობის განცხადებით, ისინი მოქალაქეებს თურქეთისკენ გადაადგილების უფლებას სიტუაციის დაწყნარების შემდეგ მისცემენ.