პარტია ქართული ოცნების თავმჯდომარის პოსტს, ბიძინა ივანიშვილის დაბრუნებამდე, საქართველოს პრემიერ-მინისტრი გიორგი კვირიკაშვილი იკავებდა.

გიორგი კვირიკაშვილის განცხადებით, მან თავად შესთავაზა ივანიშვილს პარტიაში თავმჯდომარის პოსტზე დაბრუნება. პრემიერმა თქვა, ივანიშვილი მათ შეთავაზებას დათანხმდა.

პრემიერის თქმით, უახლოეს დღეებში გაიმართება პარტიის პოლიტსაბჭოს სხდომა და ყრილობა:

"როგორც პოლიტსაბჭო და ასევე მთელი საქართველოდან წარმოდგენილი დელეგატები, ერთხმად აირჩევენ ბიძინა ივანიშვილს ახალ თავმჯდომარედ. ასევე აირჩევენ პოლიტსაბჭოს ახალ შემადგენლობასაც", - განაცხადა კვირიკაშვილმა.

დღეს, 26 აპრილს, პრემიერმა გიორგი კვირიკაშვილმა განაცხადა, რომ პარტიის დამფუძნებელი, ბიძინა ივანიშვილი ქართული ოცნების თავმჯდომარე გახდება.

ბიძინა ივანიშვილმა ქართული ოცნება 2012 წელს დააფუძნა და პირველი ოქტომბრის საპარლამენტო არჩევნებით, პოლიტიკურმა ძალამ ერთიანი ნაციონალური მოძრაობის მმართველობა ჩაანაცვლა.

2015 წელს, ბიძინა ივანიშვილი გურია NEWS-თან ინტერვიუში ამბობდა, რომ იმ შემთხვევაში დაბრუნდებოდა, თუ რაიმე საოცრება მოხდებოდა ხელისუფლებაში.