სოციალური მომსახურების სააგენტოს თანამშრომლები დებთან, რომლებსაც 9 დღე ეძებდნენ არ მუშაობს. ამის შესახებ On.ge-ს სოციალური მომსახურების სააგენტოს მეურვეობისა და მზრუნველობის სამმართველოს უფროსმა ეთერ ცხაკაიამ განუცხადა.

მისი თქმით, მათი სააგენტოს თანამშრომლებს 16 და 17 წლის დების ოჯახთან კომუნიკაცია ორჯერ ჰქონდათ. პირველად, როცა გოგოების გაუჩინარების შესახებ გახდა ცნობილი და მეორედ, როცა საპროცესო წარმომადგენლები ნაპოვნ გოგოებს კითხავდნენ. უწყებაში მიაჩნიათ, რომ გოგოებთან და ოჯახთან მუშაობა საჭირო არაა.

"ამ ეტაპზე საქმეს იძიებენ და ვერ ჩავერევით, ოჯახი შეფასებულია სოციალური მუშაკის მიერ და პრობლემები არ იკვეთება. ამის შემდეგ თუ კიდევ გახდება საჭირო, მომართვის საფუძველზე, ჩავერთვებით", - განუმარტა ეთერ ცხაკაიამ On.ge-ს.

მისი თქმით, იმ დროს როდესაც პრობლემა ბულინგია, საკითხის მოგვარებაში მთავარი როლი მანდატურსა და მანდატურის სამსახურთან არსებულ ფსიქოლოგთა ცენტრს აქვს.

"ამ ეტაპზე ამ საპროცესო წარმომადგენლობის გარდა სააგენტოს ჩართულობის საჭიროება არ იკვეთება", - ამბობს ეთერ ცხაკაია.

On.ge დაუკავშირდა განათლების სამინისტროს, რათა გაგვეგო როგორ მუშაობს მანდატურის სამსახური და განათლების სამინისტრო ერთად, არის თუ არა ბულინგის პრობლემა იმ სკოლაში, სადაც დები სწავლობენ და საერთოდ უწევს თუ არა დახმარებას არასრულწლოვნებს და მათ ოჯახს ფსიქოლოგები.

On.ge განათლების სამინისტროს პასუხს ამ დრომდე ელოდება.

16 და 17 წლის დები 12 აპრილს გაუჩინარდნენ და 9 დღის შემდეგ მეგობრის სახლში იპოვეს. გოგონების სახლიდან გაქცევის მიზეზად რამდენიმე ვერსია განიხილებოდა. ერთ-ერთი ვერსიით, დებმა სახლიდან გაქცევა მამასთან კონფლიქტის გამო გადაწყვიტეს, მეორე ვერსიით კი, ისინი თანატოლების მხრიდან ბულინგის მსხვერპლნი იყვნენ.