საქართველოს პარლამენტის წევრი პატრიოტთა ალიანსიდან, გიორგი ლომია მოლაპარაკებების მოსამზადებელი ვიზიტით საქართველოს ოკუპანტ ქვეყანაში, რუსეთში ჩავიდა. ამის შესახებ ინფორმაცია ტელეკომპანია რუსთავი 2-მა გაავრცელა და დეპუტატს ესაუბრა.

"ვერაფერს გეტყვით, რომ ჩამოვალ მერე გავაკეთებ კომენტარს. ახლა არის, ასე ვთქვათ, წინამოსამზადებელი ვიზიტია... ცდილობთ გამომძალოთ ინფორმაცია. გეუბნებით, რომ ჩამოვალ მერე გავაკეთებ კომენტარს", - ამბობს ლომია.

კოლეგის ვიზიტის შესახებ ცნობილი არ იყო პატრიოტთა ალიანსის კიდევ ერთი წევრისთვის, ემზარ კვიციანისთვის. მისი თქმით, მოსკოვში ხშირი ვიზიტით "შანსები გაიზრდება".

"როდესაც ხელისუფლება გაჩერებულია და გაჩუმებულია, თითქოსდა გველის ნაკბენივით, ვერაფერს რომ ვერ ახერხებს ხელისუფლება, მაშინ, ამისთვის არსებობს ოპოზიცია და დანარჩენი პოლიტიკოსებიც, რომ რაღაც ნაბიჯები გადაიდგას. ამაში არაფერს ვხედავ ცუდს", - ასე შეაფასა თანაპარტიელის მოსკოვში ვიზიტი ემზარ კვიციანმა.

ის რუსთავი 2-თან საუბარში საქართველოს მოქალაქის, ყოფილი ჯარისჯაცის, არჩილ ტატუნაშვილის ცხინვალის რეგიონში სიკვდილსაც შეეხო. საუბრისას მან ხელისუფლების მხრიდან ამ საკითხზე საუბარი "ცუდ გარემოებად" მიიჩნია.

"ცუდი ის არის, რომ როდესაც დაიძრა ქართველებსა და რუსებს შორის, აფხაზებს შორის, ოსებს შორის რაღაცა წინ გადაიდგა ერთი ნაბიჯი და ხელათ გვახსოვს ტატუნაშვილი", - თქვა მან.