საქართველოს საპარლამენტო უმრავლესობის წევრი, დავით ჭიჭინაძე ამბობს, რომ თავისივე პარტიის ლიდერთან, არჩილ თალაკვაძესთან ქართულ ოცნებაში არსებულ პრობლემებზე საუბრისას შეთანხმდნენ.

"ჩემსა და არჩილს [თალაკვაძე] შორის კითხვები ამოწურულია, პასუხებიც მიცემული მაქვს. კიდევ ერთხელ ვიძახი ცალ-ცალკე ვერ გავაკეთებთ კომენტარებს. თუ არჩილს ექნება სურვილი ჩვენი შეთანხმების დარღვევის, შევთანხმდებით, ერთად დავარღვევთ, მოგცემთ კომენტარს", - უთხრა ჭიჭინაძემ რუსთავი 2-ს.

მისი თქმით, მას პოზიცია არ შეუცვლია და თუ პარტიაში იქნება მიუღებელი პირობები ამაზე ისაუბრებს.

"მე ყოველთვის ვცემდი პასუხს. თუ არ არის დასმული რაღაც ისეთი კითხვები და ისეთი პრინციპები, რომელიც ჩემთვის მიუღებელია, კომენტარი რაზე ვაკეთო? აქამდე ვცხოვრობდით უკომენტარებოდ და გავაგრძელებთ", - თქვა მან.

ქართული ოცნების შიგნით არსებულ დაპირისპირებაზე საჯაროდ საუბარი მას შემდეგ დაიწყო, რაც საზოგადოებრივი მაუწყებლობის სამეურვეო საბჭოს მეურვედ ნინია კაკაბაძის კანდიდატურის მხარდაჭერის გამო გედევან ფოფხაძემ უმრავლესობის დატოვება გადაწყვიტა.

პარლამენტის თავმჯდომარემ, ირაკლი კობახიძემ განცხადა, რომ იმ დეპუტატებს, რომლებიც ქართულ ოცნებაში არსებულ დაპირისპირებაზე ღიად ლაპარაკობენ, თანამშრომლობის გაგრძელების მიზნით წინაპირობებს წაუყენებენ. კობახიძის თქმით, წინაპირობები დისციპლინის საკითხებს უკავშირება. მისი განმარტებით, გაიწერება კონკრეტული წესები, რომელსაც შესაბამისი რეაგირების მექანიზმი მიემაგრება.