რუსეთს სახელმწიფო დუმას სურს, შეზღუდოს სოციალურ ქსელებში ისეთი ინფორმაციის გავრცელება, რომელსაც არამართლზომიერად მიიჩნევს. დუმა დაჩქარებული წესით მიიღებს კანონპროექტს, რომელიც დაავალდებულებს სოციალურ ქსელებს უხამსი, არასანდო და არამართლზომიერი ინფორმაცია დაბლოკოს. წინააღმდეგ შემთხვევაში კი კომპანიები 50 მილიონი რუბლით დაჯარიმდებიან.

BBC-ის რუსული ოფისის ინფორმაციით, კანონპროექტი ერთი წლის წინ დეპუტატებმა სერგეი ბაიარსკიმ და ანდრეი ალჩევსკიმ შეიმუშავეს, თუმცა ის არ განხილულა. კემეროვის სავაჭრო ცენტრში ხანძრის შემდეგ კი დეპუტატებმა კანონპროექტის ახალი ვერსია დაარეგისტრირეს, რომელიც პირველი მოსმენით დაამტკიცეს 289 ხმით, 14-ის წინააღმდეგ.

კანონში სოციალური ქსელები ნახსენები არ არის. დეპუტატები იყენებენ ტერმინს საზოგადოებრივი ქსელები. საზოგადოებრივ ქსელებად კი მიიჩნევენ სისტემებს, რომლებსაც აქვთ მომხმარებლის ავტორიზაცია, შესაძლებელია შეტყობინებების მიმოცვლა და იყენებს მინიმუმ 100 ათასი ადამიანი 24 საათის განმავლობაში.

კანონპროექტის მიხედვით, უნდა აიკრძალოს სოციალურ ქსელებში საზოგადოებრივად მნიშვნელოვან თემებზე არასანდო ინფორმაციის გავრცელება. ამის მაგალითად დეპუტატ ბაიარსკიმ ახსენა WhatsApp-ის საშუალებით გავრცელებულ ინფორმაცია იმის შესახებ, რომ კემეროვში ხანძარს ასეულობით ადამიანის სიცოცხლე ემსხვერპლა.

პოტენციურად საშიშად ჩაითვლება ისეთი ინფორმაციაც, რომელიც წინასაარჩევნო კანონმდებლობით არის აკრძალული. მათ შორის, სოციალური გამოკითხვები, პროგნოზები არჩევნებამდე ერთი კვირით ადრე და აგიტაცია, რომელსაც თავად კანდიდატები არ აფინანსებენ. მაგალითად: არჩევნების წინა დღეს რიგითმა ამომრჩეველმა, რომ დაპოსტოს ვის აძლევს ხმას ეს უკანონობად ჩაითვლება.

გარდა ამისა, კანონპროექტის ავტორები მოითხოვენ არაცენზურული გამოთქმების აკრძალვასაც, რომელიც აქამდე მხოლოდ მასობრივი საშუალებებში იყო აკრძალული.

კანონი სოციალური ქსელის მფლობელებს დაავალდებულებს მომხმარებლის იდენტიფიკაცია ტელეფონის ნომრით განხორციელდეს, რაც ხელისუფლებას მათ კონტროლს გაუადვილებს. რუსეთში ნომრის შეძენა, მხოლოდ პირადობის დამადასტურებელი მოწმობითაა შესაძლებელი.

როგორ იმუშავებს კანონი?

კანონი ავალდებულებს სოციალურ ქსელებს რუსეთში საკუთარი წარმომადგენლობა შექმნან. ნებისმიერ მომხმარებელს შეეძლება საჩივარი გაუგზავნოს წარმომადგენლებს არაკანონიერი ინფორმაციის შესახებ. 24 საათის განმავლობაში ეს ინფორმაცია უნდა "შეიზღუდოს ან წაიშალოს".

გარდა ამისა, კომპანიებმა მსგავსი პროფილები უნდა დაახარისხოს და მოთხოვნისთანავე გადასცეს ინფორმაცია შესაბამის უწყებებს.

მოთხოვნების შეუსრულებლობის შემთხვევაში კი სანქციებია დაწესებული. თუ კომპანია ორჯერ უარყოფს უწყების მოთხოვნას, კანონი უტოვებს ძალას მთავრობას, სასამართლოს გზით, შეუზღუდოს წვდომა სოციალურ ქსელს ინფორმაციის გავრცელებაზე.

კანონს არასიცოცხლისუნარიანი უწოდა Mail.ru-ს ხელმძღვანელმა, რომელიც V K-ს და Odnoklassniki-ს მფლობელია. მისი თქმით, კომპანიები ვერ აიღებენ საკუთარ თავზე სასამართლო ფუნქციას და ვერ გადაწყვეტენ რა სახის კონტენტი მიიჩნიონ არაკანონიერად.