არიანა გრანდემ, მანჩესტერში, მისი კონცერტის დასასრულს მომხდარი ტერაქტის შემდეგ, პირველი სიმღერა და კლიპი გამოუშვა, სახელად No Tears Left To Cry.

სიმღერა სწორედ ამ თავდასხმას ეძღვნება, ტრაგედიასა და ოპტიმიზმს, რომელიც ტერაქტიდან ორ კვირაში გამართულ კონცერტს, One Love Manchester-ს ახლდა თან.

"Ain't got no tears left to cry, so I'm loving, I'm living, I'm picking it up", - მღერის გრანდე. [აღარ დამრჩა ცრემლები, რომ ვიტირო, ასე რომ, ვაგრძელებ სიცოცხლეს, მიყვარს და ვიწყებ თავიდან].

ტექსტის მიხედვით, ამერიკელი მომღერალი შიშისა და სიძულვილის წინააღმდეგაც იბრძვის.

კლიპის პროდიუსერი მაქს მარტინია. სიმღერის დასაწყისი გოსპელითაა ინსპირირებული, თუმცა ის მალევე გარდაიქმნება პოპად. გრანდეს ვოკალს სინქრონულად ეხამება მისი ცეკვაც.

ვიდეოს ბოლოს, მანჩესტერის სიმბოლო – მუშა ფუტკარი ჩანს, რომელიც ქალაქის ფონზე კამერისკენ მიფრინავს.

2017 წლის 22 მაისს, მანჩესტერ არენაზე არიანა გრანდეს კონცერტის დასრულების შემდეგ, როდესაც კონცერტზე მისულები ტერიტორიას ტოვებდნენ, თვითმკვლელმა ტერორისტმა თავი აიფეთქა. ტერაქტს [ამფეთქებლის ჩათვლით] 23 ადამიანის სიცოცხლე ემსხვერპლა, მათ შორის იყვნენ ბავშვებიც.