კუბაში, ნაციონალური ასამბლეის სხდომაზე ქვეყნის პრეზიდენტად ყოფილი ვიცე-პრეზიდენტი, 57 წლის მიგელ დიას-კანელი ერთხმად აირჩიეს. რაულ კასტროს გადადგომით კუბაში კასტროების ერა დასრულდა.

86 წლის რაულ კასტრო კომუნისტური პარტიის პირველ მდივნად რჩება, რაც კონსტიტუციით "საზოგადოებისა და სახელმწიფოს უმაღლესი ხელმძღვანელ ძალად" განისაზღვრება. ასე რომ, ჯანმრთელობის მდგომარეობის გამო გადამდგარი რაულ კასტრო კუბაში ყველაზე ძლევამოსილ ადამიანად ისევ რჩება.

მიუხედავად ამისა, მისი გადადგომა ქვეყნისთვის დიდი მოვლენაა. ბოლო 60 წლის განმავლობაში კუბის მმართველი პირველად არ იქნება გვარად კასტრო.

დიას-კანელი გადაიბარა ქვეყანა, რომელსაც აქვს ეკონომიკური სტაგნაცია, რომლის მოსახლეობა ბერდება და ახალგაზრდებში იმედგაცრუება უფრო მეტად მატულობს.

ვინ არის მიგელ დიას-კანელი

განათლებით ინჟინერი დიას-კანელი მშობლიურ პროვინციაში, ვილა კლარაში კომუნისტური პარტიის ლიდერი ჯერ კიდევ 1990-იან წლებში გახდა. 2003 წელს ის გადაიყვანეს პროვინცია ოლგინში, რომელიც კუბის ტურისტული ცენტრია. 2009 წელს კანელ-დიასი გადაიყვანეს ჰავანაში და განათლების მინისტრად დანიშნეს, ხოლო 2013 წელს რაულ კასტრომ პირველ ვიცე-პრეზიდენტად დაასახელა. ამის შემდეგ პოლიტიკურ ღონისძიებებზე ის კასტროს მაგივრად გამოდიოდა, იღებდა უცხოურ დელეგაციებს და ხელისუფლების სახელით საზღვარგარეთ დადიოდა.

ფოტო: AFP

სანამ მიგელ დიას-კანელი ცენტრალური ხელისუფლებისკენ გადაინაცვლებდა მის მშობლიურ პროვინციაში მას ახასიათებენ, როგორც მიმზიდველ და მეგობრულ ადამიანს, რომელიც ყოველთვის აღწევს მიზანს.

90-იანებში, როდესაც საწვავის შოვნა რთული იყო, მომავალი პრეზიდენტი სამსახურში ველოსიპედით დადიოდა და არა საბჭოური ლადით, რომელიც კუბელ ჩინოვნიკებს შორის საკმაოდ პოპულარული იყო.

ის, ასევე, მხარს უჭერდა სანტა-კლარაში ლგბტ თემის მიმართ კეთილგანწყობილ კულტურულ ცენტრს მაშინ, როდესაც პარტიაში ჰომოფობია ნორმად მიიჩნეოდა.

იმის გამო, რომ კუბაში პოლიტიკური აგიტაცია აკრძალულია, დიას-კანელის პოლიტიკური შეხედულებები უცნობია. ერთი მხრივ, ის ლიდერების ახალგაზრდა თაობის წარმომადგენელია, რომელიც კუბის მოდერნიზაციის მომხრეა. მეორე მხრივ, დიდი ხანია კომუნისტური პარტიის წევრია და მისგან რადიკალურ პოლიტიკურ ცვლილებებს არ უნდა ველოდოთ.