ევროპული საქართველოს ლიდერი, დავით ბაქრაძე, მიიჩნევს, რომ სახელმწიფო უსაფრთხოების ანგარიში და ქვეყანაში არსებული რეალური ვითარება ფუნდამენტურად განსხვავდება ერთმანეთისგან. მისი თქმით, უსაფრთხოების სამსახური ძირითად რესურსს ოპოზიციის თვალთვალსა და პოლიტიკური ოპონენტების კონტროლზე ხარჯავს.

"სუს-ის ანგარიშში, სრულიად სამართლიანად, საფრთხედ არის შეფასებული რუსული პროპაგანდა საქართველოში და ამ დროს ვხედავთ, რომ საქართველოში გაჩნდა ახალი რუსული პროპაგანდისტული არხი გაზპრომის შვილობილის სახით. ამ ანგარიშში სამართლიანად წერია, რომ ტერორიზმი არის საფრთხე საქართველოში და ვხედავთ, რომ თბილისში თვეების მანძილზე გაურკვევლად, დაუსჯელად გადაადგილდებოდა ჩატაევი თავის თანამებრძოლებთან ერთად. ანგარიშში საერთოდ არ წერია, მაგალითად, ოპოზიციაზე თვალთავლი და მიყურადება და ამ დროს ვხედავთ, რომ რეალურ ცხოვრებაში სწორედ ამითია სახელმწიფო უსაფრთხოების სამსახური დაკავებული", - თქვა ბაქრაძემ.

სახელმწიფო უსაფრთხოების სამსახურის უფროსმა, ვახტანგ გომელაურმა პარლამენტში, ყოველწლიური ანგარიში წარდგინა. ანგარიშში ნათქვამია, რომ 2017 წელს ოკუპირებული ტერიტორიების მიმდებარედ ე.წ. საზღვრის კვეთის ბრალდებით საოკუპაციო ძალებმა 178 ადამიანი დააკავეს. სუს-ის ანგარიშში აღნიშნულია ისიც, რომ უცხო ქვეყნების სპეცსამსახურები საქართველოში ანტიდასავლურ განწყობებს აღვივებენ და თავისი მიზნების მისაღწევად მედიასაშუალებებსაც იყენებენ.