პრეზიდენტი გიორგი მარგველაშვილი აჭარის ავტონომიური რესპუბლიკის უმაღლეს საბჭოს ფრაქციის თანასწორობა წევრებს შეხვდა. ასმათ დიასამიძესა და მედეა ვასაძესთან შეხვედრისას, გიორგი მარგველაშვილმა აჭარის ავტონომიური რესპუბლიკის მთავრობის მეთაურის კანდიდატურის წარდგენასთან დაკავშირებით ისაუბრა.

პრეზიდენტის ადმინისტრაციის განცხადებით, შეხვედრაზე აჭარის ავტონომიური რესპუბლიკის თავმჯდომარის პოსტზე ზურა პატარაძის კანდიდატურის წარდგენის საკითხი განიხილება.

პრეზიდენტი უკვე შეხვდა ფრაქცია ქართული ოცნება - დემოკრატიული საქართველოს, ფრაქცია ქართული ოცნება - აჭარის თავმჯდომარეებს.

პრეზიდენტი ასევე უმაღლესი საბჭოს ფრაქციების ერთიანი ნაციონალური მოძრაობა და ნაციონალური მოძრაობა - მაჟორიტარები თავმჯდომარეებს, რობერტ ჩხაიძესა და ირაკლი ბარამიძეს შეხვდა. შეხვედრისას აჭარის ავტონომიური რესპუბლიკის თავმჯდომარის პოსტზე ზურა პატარაძის კანდიდატურის წარდგენის საკითხი განიხილეს.

ქართული ოცნების აჭარის უმაღლესი საბჭოს დეპუტატის, ანზორ თხილაიშვილის განცხადებით, დღეს ჩატარდება ბიურო, ხვალ კი დღის 12 საათისათვის სესიაზე აირჩევენ მთავრობის თავმჯდომარეს.

ყოფილმა თავმჯდომარემ არჩილ ხაბაძემ საკუთარი ნებით 6 ივლისს თანამდებობა დატოვა. მასთან ერთად უფლებამოსილება შეუწყდება აჭარის მინისტრთა კაბინეტის წარმომადგენლებსაც.