წინასწარი მონაცემებით, აზერბაიჯანის პრეზიდენტი ხმების 86 პროცენტით ისევ ილჰამ ალიევია. 15-წლიანი მმართველობის განმავლობაში ის პირველად აირჩიეს შვიდწლიანი ვადით.

აზერბაიჯანის ცენტრალური კომისიის განცხადებით, მოქალაქეების აქტივობა 74,5 პროცენტი იყო. ილჰამ ალიევმა 2013 წლის არჩევნებთან შედარებით 1,5 პროცენტით მეტი ხმა მიიღო.

როგორც ოპოზიცია და დამკვირვებლები ამბობენ, საარჩევნო უბნებზე დარღვევები დაფიქსირდა. ერთ-ერთ უბანზე ჩართული ჰქონდათ მუსიკა, ცეკვავდნენ და სელფებს იღებდნენ.

აზერბაიჯანის საპრეზიდენტო არჩევნები 2018 წლის ოქტომბერში უნდა ჩატარებულიყო, თუმცა თებერვალში პრეზიდენტ ილჰამ ალიევის განკარგულებით, ვადამდელი არჩევნები 11 აპრილს დაინიშნა.

ილჰამ ალიევი აზერბაიჯანის პრეზიდენტი პირველად 2003 წელს გახდა. ხუთი წლის შემდეგ ალიევი პრეზიდენტად ისევ აირჩიეს. 2009 წელს ქვეყანაში ჩატარდა რეფერენდუმი, რომლის მიხედვითაც კონსტიტუციაში შევიდა ცვლილებები, რომლის მიხედვითაც ერთსა და იმავე პირს პრეზიდენტობა შეუზღუდავი რაოდენობით შეუძლია. სწორედ ამის შემდეგ ილჰამ ალიევი პრეზიდენტი 2013 წელსაც გახდა.