აშშ-ის სანქციების საპასუხოდ, რუსეთის პრემიერ-მინისტრის, დიმიტრი მედვედევის განცხადებით, რუსეთის ბაზარზე ამერიკული საქონლის იმპორტი უნდა შეიზღუდოს. წერს BBC-ის რუსული სამსახური.

მედვედევის თქმით, სანქციების საპასუხო ქმედებაზე საბოლოო გადაწყვეტილებას რუსეთის პრეზიდენტი მიიღებს.

"ჩვენ ბაზარზე საკმაოდ ბევრი პროდუქცია გვაქვს აშშ-დან. არა მხოლოდ ფასიანი ქაღალდები, რომელთა საკითხი ცალკე უნდა მოვაგვაროთ, არამედ მთელი რიგი სხვა პროდუქცია, რომელიც ჩვენს ბაზარზე შემოდის და ამერიკული ბიზნესი აწარმოებს", - განაცხადა მედვედევმა.

მისივე განმარტებით, საპასუხო ქმედებები უნდა იყოს ადეკვატური და ისე შემუშავებული, რომ რუსეთს ზიანი არ მიადგეს.

BBC წერს, რომ დიმიტრი მედვედევი კომპანია Apple-ს პროდუქციის დიდი მომხმარებელია. აიფონითა და აიპადით ხელში ის არაერთხელ შეუმჩნევიათ.

აშშ-მ რუსი ბიზნესმენებისა და რუსული კომპანიების წინააღმდეგ ახალი სანქციები 6 აპრილს აამოქმედა. აშშ-ის პერსონალური სანქციების სიაში შვიდი რუსი ოლიგარქი მოხვდა. ასევე სახელმწიფო მოხელეები, ჩინოვნიკები და რადენიმე კომპანია.

ამერიკულმა ჟურნალმა ფორბსმა დაწერა, რომ ახალი სანქციების მონაწილე რუსმა ბიზნესმენებმა მხოლოდ ორშაბათს, 9 აპრილს, დღის პირველ ნახევარში, ჯამში სამი მილიარდი დოლარი დაკარგეს. ხოლო ზოგადად, ფორბსის სიაში შემავალმა ყველა რუსმა ოლიგარქმა ერთად (მათი ჩათვლით, ვისაც სანქციები არ შეეხო) საერთო ჯამში 14 მილიარდი დოლარი დაკარგა.

დაეცა ისეთი კომპანიების აქციები, როგორიცაა - გაზპრომი, სბერბანკი, ლუკოილი, როსნეფტი, ნორილსკი ნიკელი.