ამერიკის შეერთებულმა შტატებმა შვიდ ბიზნესმენსა და 17 სახელმწიფო მოხელეს ე.წ. კრემლის სიიდან სანქციები დაუწესა. სანქციები ფინანსთა სამინისტრომ შეიმუშავა.

სიაში მოხვდნენ ბიზნესმენები ოლეგ დერიპასკა, იგორ როტენბერგი, კირილ შამალოვი, ვიქტორ ვეკსელბერგი და სხვები. სანქციები შეეხო, ასევე, 12 კომპანიას, რომელიც ამ ბიზნესმენებს ეკუთვნით.

სახელმწიფო მოხელეების სიაში ნახსენები არიან შინაგან საქმეთა მინისტრი, რუსეთის გვარდიის მეთაური, საერთაშორისო საკითხებში სახელმწიფო უსაფრთხოების კომიტეტის ხელმძღვანელი, უშიშროების საბჭოს მდივანი და სხვები. გარდა ამისა, სიაში მოხვდნენ VTB ბანკისა და გაზპრომის ხელმძღვანელები.

"რუსეთის ხელისუფლება მთელ მსოფლიოში სხვადასხვა მტრულ მოქმედებებშია ჩართული, მათ შორის ყირიმის ოკუპაცია და უკრაინის აღმოსავლეთით ძალადობის წახალისება, ასადის რეჟიმის იარაღით მომარაგება, რომელიც თავის მოქალაქეებს ბომბავს", - ნათქვამია ფინანსთა სამინისტროს განცხადებაში.

აშშ-ის ფინანსთა სამინისტრომ ე.წ. კრემლის სია 2018 წლის იანვარში გამოაქვეყნა. სიაში რუსი ბიზნესმენები და სახელმწიფო მოხელეები მოხვდნენ, კერძოდ, ყველა რუსი მეწარმე, რომლის ქონება ერთ მილიარდ დოლარს აღემატება.

2017 წლის აგვისტოში აშშ-ის პრეზიდენტმა, დონალდ ტრამპმა ხელი მოაწერა კანონს "ამერიკის მოწინააღმდეგეებისთვის სანქციების გზით წინააღმდეგობის გაწევის შესახებ". სწორედ ამ კანონის ფარგლებში შეადგინეს ე.წ. კრემლის სია.