ცენტრ პოინტის დამფუძნებელი, მაია რჩეულიშვილი აცხადებს, რომ ცენტრ პოინტ აჭარის გაყიდვების მენეჯერი, სალომე ჩარკვიანი პროკურატურის მძევალია და საგამოძიებო უწყება მას რჩეულიშვილების წინააღმდეგ გამოიყენებს:

"პროკურატურა შეფარვით ფიქრობს, რომ გამოიყენონ ის ჩემ წინააღმდეგ, პირადად ჩემ წინააღმდეგ. სალომეს იურიდიული განათლება არ აქვს, მაგრამ მე ვადასტურებ, რომ სალომეს, არც თავის საქმიანობის პერიოდში და არც შემდგომ მიუთვისებია კომპანიის კუთვნილი ფინანსები".

სალომე ჩარკვიანი და ცენტრ პოინტის ბათუმის საინვესტიციო პროექტის ხელმძღვანელი ირაკლი მინდელი 10 ივლისს დააკავეს. გარდა ამისა, პროკურატურამ სისხლისსამართლებრივი დევნა ცენტრ პოინტის დამფუძნებლის, მაია რჩეულიშვილისა და მისი შვილის, გუკა რჩეულიშვილის წინააღმდეგ დაიწყო. თუმცა, გუკა რჩეულიშვილი საგამოძიებო უწყებაში ამ დრომდე არ გამოჩენილა, მასზე ძებნაა გამოცხადებული. მაია რჩეულიშვილის დაპატიმრების მოთხოვნა კი სასამართლომ არ დააკმაყოფილა.

სასამართლო ცენტრ პოინტის დამფუძნებლებს ჯგუფურად სხვისი ქონების გაფლანგვას ედავება, საქმე ათეულობით მილიონ ლარს ეხება.