შინაგან საქმეთა სამინისტროს თანამშრომლებმა ქურდობის ბრალდებით წარსულში მრავალჯერ ნასამართლევი ალადინ ი. დააკავეს. სამართალდამცავებმა, მისი სახლის ჩხრეკისას, მოპარული ნივთების გარდა, ცეცხლსასროლი იარაღი და ნარკოტიკული საშუალების შემცველი მცენარეები ამოიღეს.

შსს-ს ინფორმაციით, გამოძიებამ დაადგინა, რომ ბრალდებულმა გარდაბნის რაიონში მდებარე ერთ-ერთი ხის საამქროდან ელექტროხელსაწყოები მოიპარა და შემთხვევის ადგილიდან მიიმალა.

დაკავებულის საცხოვრებელი სახლისა და ეზოს ჩხრეკისას, სამართალდამცველებმა ხის საამქროდან მოპარული ელექტროხელსაწყოების გარდა, ამოიღეს ეფ-1-ის ტიპის ხელყუმბარა, გადაჭრილი თოფი - ე.წ. აბრეზი, 6.81 გრ გამომშრალი მარიხუანა და 2 ძირი კანაფი. დაკავებული ჩადენილ დანაშაულს აღიარებს.

გამოძიება ქურდობის, ნარკოტიკული საშუალების უკანონო შეძენა-შენახვის, ნარკოტიკული საშუალების შემცველი მცენარის კულტივაციისა და ცეცხლსასროლი იარაღის მართლსაწინააღმდეგო შეძენა-შენახვის ფაქტებზე მიმდინარეობს.