საფეხბურთო კლუბ მესინას გოლკიპერმა არმანდო პრისკომ სიცილიური დერბის დროს წითელი ბარათი მიიღო.

ამის მიზეზი ის გახდა, რომ 21 წლის მეკარემ მატჩის დასრულებამდე ვერ მოითმინა და თამაშის მიწურულს მოშარდვა გადაწყვიტა.

"დღის განმავლობაში დაახლოებით 2-3 ლიტრამდე წყალს ვსვამ. ამ დღეს საპირფარეშოს 4-ჯერ მივაშურე. ჯერ სტადიონზე მოსვლისთანავე, შემდეგ მოთელვებამდე, ამის მერე გასახდელში ყოფნისას და ბოლოს, პირველი ტაიმის დასრულების შემდეგ".

"უბრალოდ მეტის მოთმენა აღარ შემეძლო. წრეზე დავრბოდი და შეშლილს ვგავდი. როცა აღმოვაჩინე, რომ ცვლილების გამო მატჩი დროებით შეჩერდა, სიტუაციის გამოყენება ვცადე. გავითამაშე, თითქოს სარეკლამო ბანერთან მოთელვას ვაკეთებდი. ეს ვერავინ შეამჩნია, სამწუხაროდ, მსაჯის გარდა".

იტალიელი მეკარე მსაჯს მიღებული გადაწყვეტილების გამო არ ადანაშაულებს.

"მე იქვე მოვიხადე ბოდიში და არც გამიპროტესტებია, რამდენადაც ვხვდები, რომ იგი წესების სრული დაცვით მოიქცა. უბრალოდ მინდა ხაზი გავუსვა, რომ არანაირი უხამსობა არ ჩამიდენია. ვაცნობიერებდი, რომ ტრიბუნებზე ბავშვებიც იყვნენ და ყველანაირად ვცადე, რომ ჩემი მოქმედება შემენიღბა".

"სწორად არ მოვქცეულვარ, თუმცა მეტის მოთმენა მართლა არ შემეძლო" - აღნიშნა პრისკომ.